DILI, 13 agostu 2024 (TATOLI)—Membru Parlamentu Nasionál (PN) liuhusi Deputadu PD, Manuel Noronha, preokupa menoridade agora barak mak kontinua faan sasán iha dalan ninin.
Notísia Relevante: Membru PN husu Governu asegura labarik sira-nia direitu ba protesaun
“Hakarak hato’o observasaun ba labarik kiik-oan sira faan sasán. Ha’u la’o iha fatin-fatin hanesan loza, estrada ninin, tasi-ibun, supermerkadu, merkadu no liuliu kruzamentu no fatin sumafóru nian hanesan iha Timor Plaza ho Lider nia oin, kuaze menoridade mak faan sasán hanesan pentolan, manu-tolun, krupuk no seluk tan. Bainhira karreta para iha lampu merah labarik sira tabele odamatan karreta nian hodi husu atu ema sosa sira-nia sasán,” nia levanta liuhusi reuniaun plenária komisaun permanente iha Parlamentu, tersa ne’e.
Fatin sira-ne’e, nia dehan, risku tebes ba ema-nia vida maibé labarik sira husi tuku 06h00 dadeersan to’o tuku 20h00 kalan sei nafatin faan sasán iha fatin sira-ne’e.
Membru husi órgaun lejislativu ne’e hateten, tuir konvensaun direitu labarik nian hateten katak, labarik ida-idak iha direitu atu hetan protesaun husi esploitasaun ekonómiku.
Nune’e mós konstituisaun artigu 18 ko’alia kona-ba protesaun labarik ne’ebé iha alínea dahuluk hateten, labarik sira iha direitu ba protesaun espesiál husi família, komunidade no mós Estadu liuliu hasoru hahalok hotu hanesan la tau matan, diskriminasaun, violénsia, presaun, abuzu seksuál no esplorasaun.
“Mosu dúvida labarik sira-ne’e eskola ka lae, se eskola oinsá tempu ba estuda no la eskola família viola sira-nia direitu ka lae,” nia dehan.
Nune’e, nia apela ba família atu labele obriga labarik sira tuir inan-aman nia hakarak maibé tenke tau prioridade ba sira hodi eskola no fó tempu atu estuda.
Hanesan reprezentante povu iha uma fukun Parlamentu, nia husu ba ministériu kompetente atu haree asuntu ne’e ho sériu hodi tau atensaun.
Vise Ministru ba asuntu Parlamentár, Adérito Hugo da Costa, hateten komandu PNTL Dili hahú ona iha kada fim de semana hala’o operasaun iha kapitál Dili hodi prevene envolvimentu menoridade iha faan sasán iha espasu ne’ebé temi.
Operasaun ne’e, hala’o koordenasaun no entidade relevante sira seluk no kontinua halo investigasaun karik iha envolvimentu organizasaun balun organizadu hodi envolve labarik sira iha atividade refere.
Notísia Relevante: Rezultadu peskiza hosi CNCTI, labarik 12,5% envolve iha traballu infantíl
Jornalista : Nelson de Sousa
Editór : Cancio Ximenes
