PR Horta konsidera Japaun sai fatór xave ba dezenvolvimentu iha Timor-Leste

DILI, 13 agostu 2024 (TATOLI) – Prezidente Repúblika, José Ramos Horta, tersa ne’e, hasoru malu ho Vise-Ministru Parlamentár Japaun nian ba Negósiu Estranjeiru, Komura Masahiro, hodi diskute kona-bá hametin liután parseria kompresivu entre Timor-Leste, tanba Japaun sai fatór xave ba dezenvolvimentu iha Timor-Leste
“Ho ksolok boot ha’u simu Komura Masahiro iha Timor-Leste. Ita-nia nasaun sira iha relasaun amizade ne’ebé kle’an no metin, ida-ne’ebé sai nu’udar instrumentál iha ita-nia viajen ba dame no konstrusaun nasaun. Tanba Japaun sai hanesan fatór xave ba Timor-Leste nia progresu dezenvolvimentu iha área oioin”, Xefe Estadu afirma hafoin enkontru ho Governante Japaun ne’e, iha Palásiu Presidensiál, Bairru-Pité-Dili.
Notísia relevante:Japaun iha kompromisu kontinua apoia dezenvolve Timor-Leste

Nune’e, Xefe Estadu ne’e dehan : “Ami hakarak hametin liu tan ita-nia relasaun no esplora dalan foun ba koperasaun ne’ebé sei fó benefísiu ba ita-nia nasaun rua no kontribui ba prosperidade rejionál”.
Prezidente Ramos Horta no Vise-Ministru Masahiro hala’o enkontru bilaterál hanesan meiu ida atu diskute mós koperasaun entre Timor-Leste no Japaun kona-ba dezenvolvimentu infraestrutura, diversifikasaun ekonómika, no kapasitasaun rekursu umanu.
Iha okaziaun ne’e, parte rua ko’alia mós kona-ba kontinuasaun apoiu Japaun nian ba prosesu adezaun Timor-Leste ba ASEAN no asinatura akordu ida atu hadi’ak Ospitál Nasionál Guido Valadares.
Lider na’in rua nota investimentu setór privadu Japaun nian ne’ebé aumenta iha Timor-Leste, inklui projetu sira hosi Tsuneishi Shipbuilding no INPEX Corporation.
Vizita ida-ne’e bazeia husi momentu viajen produtivu Primeiru-Ministru, Xanana Gusmão nian ba Japaun iha Dezembru 2023 no refleta amizade kle’an entre nasaun rua ne’e.
Timor-Leste hein atu habelar liután ninia parseria komprensivu ho Japaun iha tinan hirak oin mai.
Iha fatin hanesan, Vise-Ministru Parlamentár Japaun nian ba Negósiu Estranjeiru, Komura Masahiro, hateten, vizita ne’ebé nia halo atu hametin liutan relasaun Timor-Leste ho Japaun.

“Ha’u-nia objetivu prinsipál mak atu enkontru ho Prezidente Repúblika, atu hametin liután ita-nia relasaun bilaterál sira. No dala ida ne’e, ami troka hanoin kona-ba medida sira hodi hametin relasaun bilaterál sira, no mós resposta sira ba kestaun rejionál no internasionál sira, hodi konsidera elevasaun hosi ami-nia relasaun ba parseria abranjente ida iha fulan-Dezembru tinan kotuk,” Vise-Ministru ne’e tenik.
Japaun iha intensaun atu koopera hamutuk ho Timor-Leste, nasaun ne’ebé Japaun fahe valór no prinsípiu fundamentál sira hodi mantein no reforsa orden internasionál ne’ebé livre no nakloke, bazeia ba Estadu Direitu.
“Ami hato’o ami-nia kompromisu no kontinua fó apoiu maka’as ba Timor-Leste hodi hadi’a infraestrutura, formasaun, entre sira seluk,” nia hakotu.
Notísia relevante:KM aprova akordu kontribuisaun millaun $19,6 husi Japaun hodi rekualifikasaun HNGV
Jornalista: Hortencio Sanchez
Editór: Florencio Miranda Ximenes

