OÉ-CUSSE, 14 Agostu 2024 (TATOLI) – Komando Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), preokupa ho preparasaun kona-ba vizita Papa Franciscone’ebé seidauk másimu, maske hela semana tolu de’it tama ona ba preparasaun finál.
“Ita agora ne’e foku liu ba preparasaun vizita Amu Papa, tanba vizita ne’e la’ós kada tinan mak mai. Agora, ita-nia Prezidente Autoridade ho Komisaun ZEEDOA mós sira iha Dili ne’ebá, sira mós preokupa kona-ba vizita Amu Papa nian”, Komandante PNTL Oé-Cusse, Superintende Polísia Nicolau Francelino da Costa, informa iha otél Ambeno.
Autoridade Polísia Oé-Cusse ne’e hateten parte seguransa to’o agora seidauk simu informasaun ofisiál kona-ba fatin ba sarani Oé-Cusse atu konsentra hamutuk iha Dili.
Notísia relevante: Governu Sentrál koordena Autoridade RAEOA kona-ba preparasaun sarani ba vizita Papa iha Dili
“Ha’u mós ko’alia ona ho padre sira, agora, ita Oé-Cusse atu bá Díli hela loos iha ne’ebé? Balun dehan iha Tíbar no seluk dehan iha Pelican Paradise, maibé ida ne’e mós seidauk klaru. Ita-nia ekipa bá ona survey fatin ka seidauk tanba ita preokupa ho enkontru de’it. Ida-ne’e mak problema ba ita, tanba ita atu bá Dili ne’e oinsá?”, komandante ne’e haktenik.
Tuir nia, maske parte autoridade RAEOA no entidade relevante sira seidauk halo preparasaun másima, miabé Komando PNTL Oé-Cusse deside ona tarefa serbisu ba membru sira.
“Prepara mós ekipa atu fó apoia ba iha komando jerál. Sira-ne’ebé atu akompaña mós ita-nia sarani sira, ha’u rasik mak sei lidera, tanba PNTL sira-ne’ebé atu bá apoia komando jerál, inklui akompaña sarani sira husi Oé-Cusse ba Dili hamutuk 91”, nia informa.
Komandante ne’e salienta katak sira-ne’ebé hela atu halo atendimentu iha Komando PNTL Oé-Cusse hamutuk na’in-30, na’in-15 mak sei akompaña sarani sira husi Oé-Cusse bá Dili, no na’in-40 sei fó apoia seguransa nasionál, inklui membru tranzitu na’in-neen.
“PNTL Oé-Cusse menus tebes, ita-nian totál membru 100-resin de’it, ne’ebé na’in-30 mak sei hela iha Oé-Cusse atu asegura situasaun Oé-Cusse”, nia garante.
Relasiona ho asuntu ne’e, jornalista tenta konfirma prosesu rejistrasaun sarani sira ba iha Vise-Koordenadór II, Pe. Carlos de Deus, maibé seidauk bele fó informasaun tanba sei halibur dadus iha parókia sira husi sub-rejiaun Pante Makasar, Oésilo, Pássabe no Nítibe.
Notísia relevante: Komandu F-FDTL no PNTL garante laiha perturbasaun iha ámbitu vizita Amu Papa
Lembra katak, iha 11 Jullu 2024, Prezidente Autoridade RAEOA, Rogério Lobato, konvoka ona enkontru estabelesimentu komisaun organizadora hamutuk ho PNTL no F-FDTL no autoridade igreja katólika.
Liuhusi sorumutu ne’e, kria ona estrutura mak hanesan Prezidente Autoridade RAEOA nu’udar Koordenadór Komisaun Organizadora, Vise-Koordenador I mak Koordenadór Ezekutivu ZEEDOA, João Mendes Gonçalves, Vise-Koordenador II mak Pe. Carlos de Deus, Vise-Koordenador III mak Komandante PNTL Oé-Cusse, Superintendente Polisía Nicolau Francelino da Costa no Vise-Koordenadór IV mak Sekretáriu Rejionál ba Saúde, Luís de Jesus Neno.
Notísia relevante: KM aprova rezolusaun Governu kona-ba regra seguransa durante vizita Papa Francisco
Jornalista: Abílio Elo Nini
Editora: Maria Auxiliadora
