OÉ-CUSSE, 12 juñu 2024 (TATOLI) – Governu Sentrál liuhusi Ministru Administrasaun Estatál (MAE), Tomás do Rosário Cabral, tersa ne’e hala’o enkontru koordenasaun ho Autoridade Rejiaun Administrativa Espesiál Oé-Cusse Ambeno (RAEOA), autoridade relijioza no seguránsa atu prepara ba vizita Amu Papa Francisco iha Dili, iha loron 09-11 setembru 2024 ne’e.
“Ami mai hanesan komisaun organizadora ba vizita Amu-Papa nian, mai hato’o informasaun ba sira, kona-bá prepativu dezlokasaun sarani husi Oé-Cusse atu ba Dili,” Tomás Cabral ko’alia iha salaun administrasaun Numbei Oé-Cusse.
Notísia relevante: Vizita Papa Francisco hanesan forsa ida ne’ebé dudu ema hodi kontribui ba pás
Komisaun organizadora sira iha nível lokál, autoridade sira mak koordenadór ba asuntu ne’e, inklui PNTL no F-FDTL, ekipa saúde, padre no madre, sira-nia papél mak atu organiza sarani sira kada parókia kada dioseze atu ba Dili.
Tanba misa iha Tasi-tolu mós, sarani sira sei forma tuir fatin ne’ebé indikadu ona, tanba husi ekipa avansadu primeiru dehan, sarani sira sei forma tuir setór ne’ebé indika ona, setór sira-ne’e mak transforma ba estrutura governasaun nian, mai husi munisipíu no rejiaun administrativa Oé-Cusse.
“Ne’ebé ita sei monta sarani sira, tuir fatin ne’ebé Governu prepara hela iha Tasi-tolu, nune’e sarani sira to’o, sira hatene ona fatin sira-ne’ebé bele ba hola parte iha misa ne’e,” nia fó sai.
Governante esplika, intermu lojístika, Governu sei apoia no autoridade idak-daik organiza fali komisaun organizadora ho kapasidade ne’ebé Governu fó.
“Ha’u hanoin padre pároku sira iha igreja Katólika ho autoridade sira, bele buka fali meiu seluk, oinsá atu kompleta meiu ne’ebé Governu fó nune’e bele lori ita-nia sarani sira ba tuir misa no vizita Amu-Papa nian iha Dili, tanba vizita konfirmadu, mai iha loron 09 to’o 11 setembru mak fila-fali, ne’ebé atividade loron primeiru halai liu ba vizita Estadu, atividade loron rua ne’e, mak atividade pastorál, ne’ebé igreja lokál mak sei sai na’in ba atividade rua ne’e,” nia dehan.
Notísia relevante: Igreja timorense sei intensifika orasaun ba vizita Papa nian
Governante ne’e husu ba Autoridade RAEOA atu estabelese komisaun organizadora, dirije direita husi Prezidente Autoridade RAEOA, vise-primeiru padre pároku ida no vise-segundu asumi husi komandante PNTL.
“Ohin ha’u mai atu haruka komisaun ne’e ba Dili, depois autoridade sira, sei haruka lista, no ami koordena fali mós ho embaxada Indonézia iha Dili, no ohin ami mai ho Konsuladu Atambua atu hahú halo koodenasaun ho autoridade RAEOA, nune’e ema balu iha inisiativa atu liu ho terrestre karik, fronteira Indonézia bele fasilita, maibé asuntu sira-ne’e sei informa ba embaixada Indonézia iha Dili, depois embaxada mak sei komunika ba sira-nia Governu Sentrál iha Jakarta,” nia dehan.
Nia hateten, kona-bá orsamentu Governu sei apoia orsamentu balun, maibé orsamentu ne’e tuir kapasidade ne’ebé iha, igreja ho autoridade lokál sira, bele mobiliza rekursu oinsá bele apoia sarani sira atu ba Dili ne’e.
“Ita fahe ba dioseze kada dioseze ida sarani rihun 200, husi númeru ne’e mak dioseze sira sei kontribui ba parókia sira, ita sei labele ba hotu, nune’e mós seguransa sira balu sei hela,” nia katak.
Notísia relevante: F-FDTL-PNTL asina akordu operasaun konjunta iha ámbitu vizita Papa Francisco
Iha biban ne’e, Komandante PNTL Oé-Cusse, Superintendente Polísia Nicolau Francelino da Costa, agradese tanba ne’e, nia parte sei informa ba Prezidente autoridade RAEOA, katak iha tempu badak bele diskute ona kona-bá estabelesimentu komisaun organizadora nível rejionál nian.
“Ami agradese tanba ohin ita bele hetan ona informasaun oinsa atu prepara ba vizita Amu Papa mai, ne’ebé asuntu ne’e ami sei informa ba Prezidente Autoridade, tanba daudaun sei iha hela Dili, atu nune’e iha fulan ne’e nia laran ami bele harii ona komisaun ida atu diskute kle’an kona-bá preparasaun hamutuk ho nai padre no madre sira,” nia katak.
Jornalista: Abílio Elo Nini
Editór: Evaristo Soares Martins
