OÉ-CUSSE, 15 Agostu 2024 (TATOLI) – Programa Monitorizasaun Sistema Judisiál (JSMP sigla inglés) fó formasaun kona-ba lideransa transformativa ba dirijente partidu polítiku sira iha Rejiaun Administrativa Espesiál Oé-Cusse Ambeno (RAEOA).
Luís Oliveira Sampaio, nu’udar formadór husi JSMP, esplika katak atividade ne’e nia alvu mak ba kuadru partidu sira-ne’ebé hetan asentu iha Parlamentu Nasionál (PN) hanesan CNRT, Fretilin, PLP, KHUNTO no PD.
Eis-Adjuntu Komisáriu Anti-Korrupsaun ne’e dehan tema ba formasaun ne’e mak ‘Lideransa Transformativa’, maibé diskute mós kona-ba elementu sira relasiona ho tipu kualidade lideransa, inklui mós elementu hirak-ne’ebé iha ligasaun ho integridade, onestidade, akuntabilidade no matéria sira-ne’e relasiona ho asuntu polítiku atu prevene korrupsaun.
Notísia relevante: JSMP disponibiliza formasaun ba sosiedade sívil no jornalista
“Kuadru partidu polítiku sira ne’e aban-bainrua mak sei prienxe fatin estratéjiku sira iha Komisaun Funsaun Públika no fatin sira-ne’ebé iha ligasaun ho knaar governasaun. Entaun, importante hahú kedan inisiativa ida atu eleva koñesimentu kona-ba kualidade lideransa ne’ebé ita hanoin di’ak ba ita-nia rai. Partidu polítiku sira antes ba ne’ebá, sira rasik tenke koñese líder ida ne’ebé ideál ba ita-nia instuisaun Estadu sira”, Luís Oliveira Sampaio esplika iha sesaun abertura atividade ne’e, iha salaun AlFeLa, Palaban, ohin.
Nia hatutan maske iha prátika lideransa ideál, maibé persiza mós koñesimentu ba konseitu prinsípiu no elementu xave sira hanesan lideransa.
“Maske ita hodi referénsia sira husi nasaun seluk, maibé ita refleta ba ita-nia konstestu atuál hodi reforsa sira, bainhira asume knaar ruma hatene maneja ona knaar ne’e atu serbí interese públiku, tanba lideransa nia konseitu mak tenke iha kapasidade atu mobiliza, inspira iha hanoin inovativu atu transforma konseitu ida-ne’ebé iha ligasaun ho interese públiku”, nia esplika.
Iha fatin hanesan, Koordenadór Partidu CNRT Oé-Cusse, Firmindo Taeki, hanesan mós deputadu, agradese ba JSMP tanba liuhusi oportunidade ne’e bele hasa’e koñesimentu, liuliu ba asuntu lideransa nian.
“Tanba foin primeira véz fó formasaun lideransa ba dirijente partidu sira iha Oé-Cusse liga ba knaar Estadu nian. Serbisu tenke tuir parte legál nian, tanba nu’udar partidu ita ko’alia polítika de’it, maibé ita ka’er sistema tenke iha lei nia okos”, dehan.
Notísia relevante: JSMP kontinua husu PN altera lei Pensaun Vitalísia
Formasaun ne’e hetan apoiu orsamentu husi fundu sosiedade sivíl, liuhusi Servisu Apoia Sosiedade Sivíl iha Gabinete Vise-Primeiru Ministru, no formasaun ne’e realiza durante loron ida. Parte JSMP mós promove diskusaun aberta entre partisipante sira mak partidu polítiku sira iha Oé-Cusse tantu feto-mane.
Jornalista: Abílio Elo Nini
Editora: Maria Auxiliadora
