Konsulta Populár ba da-25: PPN apela timoroan hamutuk luta ba dezenvolvimentu
DILI, 16 agostu 2024 (TATOLI)—Prezidente Parlamentu Nasionál (PPN), Maria Fernanda Lay, apela ba timoroan hotu hamutuk luta ba dezenvolvimentu iha ámbitu komemorasaun loron konsulta populár ba da-25 (30 agostu 1999-30 agostu 2024) ne’ebé povu sei selebra iha 30 agostu 2024 ne’e.
Notísia Relevante: David Mandati husu líder nasionál hamutuk liberta povu husi mukit
“Iha ámbitu komemorasaun konsulta populár ba da-25, ba ita ninia hili ita-nia indepedénsia, ne’ebé ha’u espera katak eskolla ida-ne’e ita la husik monu ba rai. Maibé, ita hotu tenke hamutuk hodi lori Timor-Leste indepedente ba future, tanba, ita-nia oan no bei’oan sira depende oinsá ita jere nasaun ne’e. Ha’u fiar katak, ho líder ita-nina ne’ebé agora sei iha, serbisu hamutuk ho joven sira, ita sei kaer metin nafatin ita-nia independénsia, tanba indepedénsia ne’e la mai iha bandeza- maibé luta ho matan-ween husi populasaun sira-nian. Ne’ebé, mai ita hotu hamutuk dala ida tán luta ba ita-nia dezenvolvimentu,” PPN ne’e hateten ba Agência TATOLI iha resintu Parlamentu Nasionál, sesta ne’e.
Líder órgaun soberania daruak ne’e hateten, komemorasaun konsulta populár ba tinan ne’e espesiál tebes, tanba sei partisipa husi Sekretáriu Jerál Nasaun Unida (ONU), António Guterres, ne’ebé dezde inísiu nia kareira hanesan Primeiru-Ministru Portugál no Portugál ninia apoiu makaas tebes ba Timor-Leste iha prosesu luta ba libertasaun nasionál.
Nia fiar katak atuál Sekretáriu Jerál ONU ne’e nu’udar amigu no aliadu TL ninian, ho ida-ne’e espera loron espesiál ne’e mai timoroan hotu sei transmite hanoin durante prosesu ne’ebé ho hanoin di’ak tebes mai TL iha prosesu independénsia Timor-Leste nian.
Notísia Relevante: Antero Bendito husu líder nasionál hamutuk liberta povu husi mukit
Jornalista : Nelson de Sousa
Editór : Cancio Ximenes
