BOBONARO, 16 agostu 2024 (TATOLI) – Ministériu Komérsiu no Indústria (MCI, sigla portugés), sesta ne’e realiza atividade workshop hodi halo diseminasaun dekretu-lei númeru 90/2023, 27 dezembru kona-ba lisensiamentu industriál no dekretu lei númeru 91/2023 kona-ba baze lisensiamentu ba emprezáriu lokál no estranjeiru-sira iha munisípiu Bobonaro.
Diretór Jerál Industia iha MCI, Martins Magno, esklarese diseminasaun ne’e atu partilla informasaun kona-ba rekizitu-sira ne’ebé atu lori emprezáriu-sira hetan lisensiamentu indústria.
Notísia relevante: KM aprova Dekretu Governu regula prosedimentu lisensa atividade komérsiu-indústria
“Ita-boot sira tenke hatene didi’ak, papél indústria ne’e importante tebes ba dezenvolvimentu ekonomia iha nasaun. Papél indústria ne’e importante tebes ba dezembolvimentu ekonomia nasaun nia,” nia hateten iha salaun Alfándega, munisípiu Bobonaro
Nia hatutan esforsu ne’ebé MCI halo atu emprezariu sira mak sei kria kondisaun oinsá bele hetan rekoñesimentu iha munudu tanba daudaun ne’e Timor-Leste preparan-aan atu adere ba membru ASEAN no Membru Organizasaun Munidiál Komsériu (OMK).
Nia dehan, iha mandatu IX Governu konsege implementa ona lei hodi fó lisensa ba atividade indústria hodi proteje emprezáriu-sira hosi akuzasaun ruma ba kompetisaun negósiu no produsaun-sira.
Alende ne’e prepara mós lei indústria oinsá atu proteje emprezáriu sira-nia produsaun.
“Agora daudaun Parlamentu prepara hela atu halo diskusaun, lei ko’alia konbá direiru uza produtu ita-boot nia, sé karik ita-boot sira halo produsaun tiha mak ema ruma mós prodús, laiha koñesimentu hosi ita-boot sira, ita-boot sira bele akuza nia ho lei ne’e,” nia fó hanoin.
Sekretáriu Autoridade Munisipál Bobonaro ba Asuntu Sosiál, Júlio Carvalho Caero, agradese ba MCI no konsidera dekretu lei rua ne’e importante tebes atu motiva emprezáriu sira iha hanoin atu loke indústria hodi dezenvolve ekonomia iha munisípiu Bobonaro.
Tuir nia, durante ne’e emprezáriu lokál iha Bobonaro seidauk iha vontade atu loke indústria tanba maioria buka mak projetu hosi estadu.
“Ita ko’alia de’it buat ki’ik, hanesan tepung tapioka, tepung beras, ita iha ai-farina, hare, loloos buat ne’e fasil hela,” nia katak.
Vise-Prezidente Kámara Komsersiu Industria, Munisípiu Bobonaro, Adelino Gonçalves, konsidera ho baze legál sira ne’e bele motiva emprezáriu lokál sira atu loke indústria.
“Ita bele haree took poténsia saida mak ita-nia munisípiu ne’e iha, hodi ita bele halo sai hanesan indústria ida,” nia hateten.
Nia haklaken baze legál sira-ne’e motiva tebes CCI-TL atu konvida emprezáriu atu hamutuk lolo-liman ba malu hodi loke indústria iha munisípiu Bobonaro, tanba daudaun Banku Nasionál Komsérsiu Timor-Leste (BNCTL, sigla portugés) mós oferese kréditu ba emprezariu sira atu loke investimentu.
Enkuantu atividade diseminasaun ne’e hetan partisipasaun másimu hosi emprezáriu lokál no estranjeiru sira.
Notísia relevante: Governu mantein promove grupu joven ne’ebé iha abilidade ba indústria
Jornalista: Sérgio da Cruz
Editór: Evaristo Soares Martins
