PPN husu F-FDTL profisionaliza aan sai lutu ba nasaun
DILI, 16 agostu 2024 (TATOLI)—Prezidente Parlamentu Nasionál (PPN), Maria Fernanda Lay, husu membru FALINTIL Forsa Defeza Timor-Leste (F-FDTL) atu kontinua profisionaliza aan sai lutu ba nasaun hodi garante seguransa iha Timor-Leste.
Notísia Relevante: FRETILIN konsidera komemorasaun loron FALINTIL fó onra ba eroi-mártir sira
“Ha’u fó parabéns ba ita-nia F-FDTL no fiar sira ho idade ne’ebé aumenta, sira profisionál iha sira-nia área. Espera, sira mantein rítmu ida-ne’e, tanba hanesan lutu ba nasaun ita presiza profisionalizmu hadi’a ba nafatin,” Prezidente Parlamentu Nasionál (PPN), Maria Fernanda Lay, hateten ba Agência TATOLI realsiona ho komemorasaun loron FALINTIL ba da-49 (20 agostu 1975-20 agostu 2024) ne’ebé sei komemora iha 20 agostu 2024, iha resintu Parlamentu, sesta ne’e,
Nia hein katak, ho F-FDTL ne’ebé halo kooperasaun ho instituisaun internasionál sira bele hametin liután sira-nia kompeténsia no F-FDTL bele hola parte iha instituisaun internasionál ba pás iha mundu tomak.
Tuir konstitruisaun artigu 146 (Forsa Armada sira) iha alinea 2 ne’e hateten FALINTIL-FDTL garante independénsia nasionál, integridade territoriál, liberdade no populasaun nia seguransa hasoru agresaun ruma ka ameasa esterna, ho respeitu ba orden konstitusionál.
Notísia Relevante: Membru F-FDTL 25 halo doasaun raan komemora loron FALINTIL ba dala-49
Jornalista : Nelson de Sousa
Editór : Cancio Ximenes
