iklan

OÉ-CUSSE (RAEOA)

Rogério Lobato: F-FDTL no PNTL tenke kumpre ierarkia no defende soberania nasaun

Rogério Lobato: F-FDTL no PNTL tenke kumpre ierarkia no defende soberania nasaun

Prezidente Autoridade RAEOA, Rogério Tiago Lobato, hamutuk ho F-FDTL no PNTL selebra misa ba loron FALINTIL ba da-49, iha igreja São Minguel Arcanjo Padiae. Foto Tatoli/Abílio Elo Nini

OÉ-CUSSE, 19 Agostu 2024 (TATOLI) – Antigu Komandante Forsa Armada Libertasaun Nasional Timor-Leste (FALINTIL) iha 1975, Rogério Tiago Lobato, atuál Prezidente Autoridade Rejiaun Administrativa Espesiál Oé-Cusse Ambeno (RAEOA), husu ba FALINTL-Forsa Defeza Timor-Leste (F-FDTL) no Polísia Nasionál Timor-Leste (PNTL), atu serbisu ho dixiplina, kumpre ba orientasaun ierarkia komandu nian no serbisu ho domin atu defende soberania Timor-Leste.

Prezidente autoridade ne’e dehan hafoin partisipa iha Tema ba komemorasaun loron FALINTIL nia luta, 20 Agostu, ne’ebé la’os diferente, maibé úniku mak tempu reflesaun no tempu ba mudánsa, ne’ebé kontinua ho suni-lilin iha semitériu santa krús no kari-aifunan iha tasi-ibun hodi fó onra ba mártir libertasaun nasionál.

Kari ai-funan. Foto Tatoli/Abílio Elo Nini

“Ita tenke hamutuk lori rai ida-ne’e ba oin. Iha forsa polísia, ierarkia ne’e importante tebes. Sé mak xefe, nia mak xefe fó orden, subordináriu tenke kumpre uluk mak depois la konkorda, bele reklama, ne’e dixiplina militár”, nia afirma hafoin sunu lilin iha jardín Oébau, ohin.

Notísia relevante: Membru F-FDTL 25 halo doasaun raan komemora loron FALINTIL ba dala-49

Dirijente ne’e fó hanoin mós ba forsa seguransa F-FDTL no PNTL atu kaer metin doutrina militár nian, respeita no defende povu, hakruuk ba lei no orden, tanba farda no kilat ne’ebé uza daudaun ne’e povu nian.

“Ba imi sira-ne’ebé oras ne’e uza farda F-FDTL no PNTL nian, imi tenke orgullu. Farda ne’ebé imi hatais ne’e povu nian, kilat ne’ebé imi ka’er ne’e povu nia, kilat ne’ebé imi ka’er ne’e labele fila kontra fali povu, maibé tenke defende povu npo rai ida-ne’e”, nia fó hanoin.

Padre selebrante ba misa komemorasaun loron FALINTIL, Carlos de Deus, konsidera loron 20 Agostu nu’udar istória ba jerasaun foun sira, tanba ne’e presiza banati tuir FALINTIL sira-nia ain fatin, serBisu ho fuan no domin ba ema hotu.

“Ita-nia espera sira serbisu ho fuan no laran atu tau-matan ba povu ida-ne’ebé Maromak tau iha ida idak-idak nia liman. Bainhira ita serbisu di’ak povu hadomi no tau-matan ba ita hanesan uluk ita-nia maluk FALINTIL sira iha ai-laran, tanba sira serbisu ho fuan, ho laran, sira la hamlaha no la hamrok, tanba povu tau-matan, povu kuidadu to’o rai ida-ne’e hetan ukun rasik-aan. Tan ne’e, husu nafatin forsa sira atu-labele envolve aan iha grupu oioin, maibé sai forsa ba povu tomak iha Timor-Leste nian”, nia realsa.

Tema ba komemorasaun loron FALINTIL ne’e mak “Tempu reflesaun no tempu ba mudansa”.

Notísia relevante: Hanoin hikas loron falesimentu Komandante Nino Konis Santana

Jornalista: Abílio Elo Nini

Editora: Maria Auxiliadora

iklan
iklan

Leave a Reply

iklan
error: Content is protected !!