OÉ-CUSSE, 20 Agostu 2024 (TATOLI) – Unidade Patrullamentu Fronteira (UPF) simu ona tarefa rua husi Komando Polísia Nasionál Timor-Leste (PNTL) atu garante seguransa iha ámbitu vizita Papa Fransisco iha Timor-Leste, iha loron 09 to’o 11 Setembru 2024.
“Estratéjia PNTL, liuliu Unidade Patrullamentu Fronteira ba garante seguransa ha ámbitu vizita Papa Fransisco, UPF simu ona tarefa servisu rua hodi hala’o seguránsa ba eventu espesiál ida-ne’e, oinsa garante seguránsa,” dehan Komandante UPF, Superintendente Polísia, Euclides Belo, iha Oé-Cusse, ohin.
Notísia relevante: PNTL labele tolera grupu balun perturba orden públika iha vizita Papa Francisco
Nia informa katak, tarefa dahuluk, asegura liña fronteira tomak, halo vijilánsia no halo seguransa ba movimentu komunidade iha fronteira no daruak mak garante seguransa iha Aeroportu Internasionál Prezidente Nicolau Lobato Dili.
“Fatin rua ne’e mak persiza asegura. Agora, estratéjia atu apoia seguransa la’o di’ak mak husi kompañia Charlie UPF Oé-Cusse sei apoia sesaun ida liu, sei halo viajen bá Dili atu reforsa iha postu UPF aeroportu”, dehan.
Kona-ba dezlokasaun membru UPF sira bá iha fronteira, Euclides Belo realsa katak sei iha servisu koordenadu ho komando rejionál no hetan tulun husi F-FDTL destakadu iha Oé-Cusse atu reforsa di’ak liután zona fronteira iha tempu vizita Papa Fransisco.
“Reforsa atu garante vijilánsia no halo patrullamentu atu labele iha movimentu ilegál sidadaun hotu tantu rai-laran no rai-li’ur. Sira-ne’ebé atu partisipa misa solene iha Dili, portaun entrada Oé-Cusse nian mak Sakato kontinua bá Mota-Ain mak bá Dili”, adianta.
Notísia relevante: PNTL Oé-Cusse preokupa ho preparasaun ba vizita Papa Francisco
Daudaun ne’e, membru efetivu iha UPF hamutuk 320 mak hala’o hela seguransa iha liña fronteira no iha fulan kotuk hetan apoiu husi komando munisipíu sira hotu hamutuk na’in-47.
Jornalista: Abílio Elo Nini
Editora: Maria Auxiliadora
