DILI, 21 Agostu 2024 (TATOLI) – Ministériu Agrikultura, Pekuária, Peska no Floresta (MAPPF) sosa ona pestisida litru 1.771 ka botir 4.865 ho montante rihun $60 hodi prepara ba kombate peste sira ne’ebé sempre ataka plantasaun agrikultór sira-nia iha to’os no natar.
Diretór Nasionál Ortikultura, Lúcio Ramiro Ribeiro, informa katak ai-moruk ne’ebé sosa ne’e iha item neen mak hanesan Insektisida agremic botir 18 EC 250 ml, Insektisida Mipcinta botir 50 WP 500 gr, Insektisida Bassa botir 500 EC 400 ml, Insektisida Kanon botir 400 EC 400 ml, Fungisida Antracol 70 WP Zinck 500 gr no Fungsida Ridomil Gold 100 gr hodi reforsa stock sira ne’ebé antes ne’e asegura hela iha armazein ministériu nian.
“Ita sosa ai-moruk sira ne’e hodi kombate peste Lakataru, Gafañotu no Karkól ne’ebé sempre estraga ai-han sira ne’ebé kuda iha kada munisípiu sira atu ita bele kontinua hasa’e produsaun iha rai-laran hodi redús importasaun. Ai-moruk sira ne’e iha ona ita-nia liman no asegura ona iha armazein”, Lúcio Ribeiro dehan iha Comoro, ohin.
Dirijente ne’e realsa katak ministériu sei halo distribuisaun pestisida ba munisípiu sira ne’ebé hetan ataka maka’as husi peste, iha kada tinan, mak hanesan Covalima, Bobonaro, Ainaro, Manufahi, Viqueque no Baucau no seluk tan.
Iha sorin seluk, Diretór Servisu Agrikultura Manufahi, Eltino Araújo, informa katak daudaun ne’e stock pestisida Darmabas ne’ebé sira simu husi ministériu iha hela no utiliza ona hodi rega ba peste sira ne’ebé ataka batar no hare sira.
“Antes ne’e, ita orienta tékniku sira bá rega kada semana atu peste sira labele kontinua buras hodi estraga komunidade nia ai-han. Maibé, agora ita para provizoriamente tanba peste barak maka mate no barak halai bá fatin seluk”, nia salienta.
Ministériu iha nafatin planu hodi kontinua sosa ai-moruk hodi fahe ba munisípiu sira atu motiva nafatin agrikultór sira serbisu hodi hasa’e sira-nia produsaun.
Notísia relevante: MAPPF prevee rihun $250 ba akizisaun produtu kímiku hodi kombate peste Lakataru
Jornalista: Tomé Amado
Editora: Maria Auxiliadora
