Governu hahú konstrui moru protesaun iha mota Nunura
BOBONARO, 21 agostu 2024 (TATOLI)-Ministériu Obra Públika hahú konstrui moru protesaun iha mota Nunura, aldeia Manu-Aman, suku Tapo-Memo, postu administrativu Maliana, munisípiu Bobonaro ne’ebé iha tinan hirak liubá hetan estragu husi korrente bee.
Abitante Nunura, Agelino Santos, sente kontente no agradese ba governu tanba tau ona prioridade hodi implementa projetu ne’e.
Angelino konsidera ho implementasaun projetu ne’e bele salva estrutura ponte Nunura, komunidade nia uma no plantasaun liuliu rai ba natar.
Notísia relevante: Volume mota hosi Indonézia kontinua sobu ponte Nunura
“Ami iha mota ibun ne’e, tempu udan ne’e ameasa tebes ba ami, kada vez iha Atambua udan semana ida rua mai sa’e hotu natar laran sira-ne’e hotu, plantasaun sira-ne’e lori hotu, agora moru iha ona ne’e bele salva ona ami tanba bee mai bele tuda-an ba sorin no liu ba tasi,” nia informa ba jornalista sira iha Nunura, kuarta ne’e.
Komunidade Domingas Lemos, husu ba kompañia tolu ne’e atu ezekuta projetu referida ho responsablidade nune’e bele finaliza lalais molok udan monu-rai.
Alende ne’e tékniku Ministériu Obra Públika liuhosi Ajénsia Dezenvolvimentu Nasionál (ADN) mós presiza halo supervizaun rútina nune’e implementasaun projetu ne’e bele hatudu rezultadu ne’ebé kualidade.
“Sira mai haree no ke’e halo naruk, nune’e buat-ne’ebé halo ami povu bele uza ba tempu naruk, tanba uluk liu ba halo bronjong tiha, udan mai sobu fila fali, entaun tenke halo didi’ak no halo mós tenke lalais tanba iha ne’e fulan-setembru ho outubru ne’e udan ona,” nia katak.
Enkuantu projetu referida responsabilidade hosi kompañia tolu hanesan Zhencia Unip Lda ho totál kustu rihun $300-resin, Maliana Brother Unip Lda kustu $304,789.31 no Marshela Unip Lda $330,862.73 no obra ne’e ho totál distánsia metru 620 no kada kompañia ezekuta metru 220.
Notísia relevante: PN husu Governu halo intervensaun lalais ba ponte Nunura-Loes
Jornalista: Sérgio da Cruz
Editór: Evaristo Soares Martins
