DILI, 22 agostu 2024 (TATOLI)—Parlamentu Nasionál (PN) hili tema “Joven iha Teknolójia, Informasaun no Komunikasaun” ba programa Parlamentu Joven ba tinan ne’e, atu estudante sira-ne’ebé hanesan deputadu bele diskute no hato’o rekomendasaun ruma ba Governu.
Notīsia Relevante: Programa Parlamentu Foinsa’e lori estudante hatene funsaun Deputadu nian
“Ita seside tema ne’e, tanba ita hatene maioria joven sira agora moris iha área ida teknolójia informasaun nian, tanba ne’e PN deside ninia tema ne’e,” Deputada CNRT, Cedelízia Farria dos Santos, hateten ba jornalista sira hafoin akompaña estudante sira-ne’ebé partisipa iha programa Parlamentu Foinsa’e, iha resintu PN, kinta ne’e.
Nia hateten, estudante sekundáriu na’in-42 husi eskola sekundária iha Dili ne’ebé partisipa iha programa refere fahe ba komisaun tolu.
Komisaun ida-idak sei halo eleisaun ba meza komisaun, no sira sei uza tema ida-ne’ebé iha hodi hala’o sira-nia diskusaun no sei prodús rezolusaun no rekomendasaun ruma ba Parlamentu Nasionál hodi bele konsidera.
“Iha aban, 23 agostu, sei tama ba iha sesaun plenária ne’ebé sei prezide direta husi Prezidente Parlamentu Nasionál, Maria Fernanda Lay, hafoin ne’e sei hili eleisaun ba Prezidente Parlamentu Foinsa’e nian inklui nia vise sekretária ne’ebé ba estudante na’in 42 sei sai hanesan Deputadu,” nia hateten.
Iha plenária, estudante sira sei sai hanesan Deputadu hodi halo intervensaun levanta asuntu sosiál, edukasaun, saúde ho seluk tan hodi husu parte ezekutivu atu bele tau atensaun.
Jornalista : Nelson de Sousa
Editór : Cancio Ximenes
