DILI, 22 agostu 2024 (TATOLI)—Prezidente Komisaun C trata asuntu Finansa Públika iha Parlamentu Nasionál (PN), Cedelízia Farria dos Santos, husu ba Autoridade Munisípiu Dili (AMD) atu aumenta fatin estasionamentu iha kapitál Dili hodi bele rekolla liután reseita ba Estadu.
“Iha plenária, ida-ne’e ami ko’alia beibeik ona, bele hatama reseita husi fatin estasionamentu. Ba karreta no motor sira para ne’e, bele rekolla osan kontribuisaun loro-loron nian. Iha parte balun ne’ebé sira halo tiha ona, ita haree iha banku Mandiri nian ho Toko Lay nia oin no parte balun sira komesa rekolla ona. Klaru iha fatin balun mós seida’uk rekolla,” nia hateten ba Agência TATOLI iha resintu Parlamentu Nasionál, kinta ne’e.
Nia observa, fatin sira-ne’ebé autoridade kria ona fatin estasionamentu hanesan iha parte Audian, semafóru, nune’e presiza aumenta fatin estasionamentu tanba iha kapitál Dili fatin barak seidauk kria kondisaun ba fatin estasionamentu, tanba ida-ne’e parte ida rekolla mós reseita ba Estadu.
Aliénde ne’e, nia nota mós iha eletrisidade nia riin sira-ne’ebé ninia oferesedór telekomunikasaun sira halo lukru maibé sira uza de’it Estadu nia besi riin sira-ne’e to’o besi sira kle’uk mós la selu taxa ba Estadu.
“Ida-ne’e mós ami Parlamentu iha Komisaun C nia kestaun ko’alia no rekomenda ona ba Governu atu identifika área sira-ne’e,” nia dehan.
Nia husu Governu atu identifika mós área turístika sira atu aplika selu ba vizitante sira tama bele selu sentavu 0,25, tanba ne’e bele hatama mós reseita maibé durante ne’e la halo.
“Maibé, ita haree iha aeroportu sira komesa halo, ita tama karik sai fali selu, hanoin neineik Governu sei bele konsidera Komisaun C nia paresér no rekomendasaun sira. Ba oin, ita bele rekolla ita-nia reseita, aleinde taxa ba ita-nia saláriu, harii uma no edifísiu sira komesa selu ona ba Estadu ho sasán importadór sira ne’e mós taxa iha. Maibé, iha parte seluk tan Governu tenke konsidera hodi aumenta tan ita-nia reseita ba Estadu,” nia hateten.
Jornalista : Nelson de Sousa
Editór : Cancio Ximenes
