Siboriu 4.000 to’o ona iha Timor-Leste
DILI, 22 agostu 2024 (TATOLI)–Vise Koordenadór ba vizita Papa husi igreja no atuál Pároku igreja Santo António Motael, Pe. Guilhermino da Silva, hateten siboriu 4.000 ne’ebé prodús iha Indonézia to’o hotu ona iha Timor-Leste.
Notísia Relevante: Igreja prepara túnika 2.000 no siboriu 4.000 ba ministru estraordináriu
“Siboriu sira-ne’e to’o hotu ona iha semana kotuk,” vise Koordenadór ba vizita Papa husi igreja ne’e hateten ba Agência Tatoli, iha Motael, kinta ne’e.
Aleinde ne’e, nia dehan, tunika ne’ebé madre sira husi kongregasaun oioin suku iha raí-laran entrega hotu ona ba Komisaun organizadora igreja nian, atu bele uza iha misa solene ne’ebé Papa Francisco prezide iha Tasi-Tolu, iha 10 setembru 2024, iha tuku 16h30 lorokraik.
Tunika sira-ne’e, nia dehan, sei fahe ba ministru extraordináriu sira hamutuk 3.000 ne’ebé mai husi dioseze Dili, Baucau no Maliana.
“Tunika ho totál hamutuk 3.000 ne’e, agora daudaun raí hela iha Sekretariadu Komisaun dioseze nian hodi hein distribuisaun iha sesta (23 agostu 2024) aban,” nia dehan.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
