BOBONARO, 23 agostu 2024 (TATOLI) – Prezidente Autoridade Munisípiu (PAM) Munisípiu Bobonaro, Alexandrino Pires, esklarese akordu atu haruka traballadór-sira ba serbisu iha nasaun Korea Súl ne’e la’ós programa ‘G to’o G’ ka Governu ho Governu maibé ne’e entre autoridade ho autoridade liuhosi programa foun hanaran ‘sister city (ED8)’.
Alexandrinio Pires halo esklaresimentu ne’e hodi responde ba preokupasaun públiku ne’ebé lansa iha mídia sosiál katak Prezidente Autoridade Munisípiu Bobonaro hadau kompeténsia Gvernu Sentrál nia no harii Repúblika foun iha Timor-Leste hodi haruka traballadór-sira ba serbisu iha Korea Súl.
Notísia relevante: Autoridade Bobonaro esforsu atu haruka joven-sira ba serbisu iha rai-li’ur
“Ninia prosesu ne’e ema barak mak la komprende, ema hanoin de’it ne’e kompeténsia loloos Governu Sentrál nian, Korea Súl nia ne’e iha faze rua, faze primeiru mak ‘G to’o G’ ne’e kompeténsia Governu Sentrál nia, mas faze segundu ne’e Korea Súl nia programa ne’e sira bolu dehan sister city ou ‘ED8’ ne’e autoridade ho autoridade mak bele halo, ne’ebé maluk sira keta kunfunde sasán sira-ne’e, ne’ebé la komprende ha’u sujere estuda halo didiak lai depois mak halo komentáriu,” nia informa ba jornalista-sira, iha salaun Maria-Tapo, sesta ne’e.
Alexandrino informa, programa ne’e ba Primeiru Ministru, Kay Rala Xanana Gusmão no semana oin sei halo liña koordenasaun ka konsulta ho Sekretáriu Estádu Formasaun Profesionál no Empregu, Rogério Mendonça, no Ministériu Administrasaun Estatál, Tomás do Rosário Cabral, atu hetan autorizasaun atubele selebra kontratu entre Autoridade Munisípiu Bobonaro ho Governadór Korea Súl.
PAM fundamenta, durante ne’e nasaun seluk hanesan Vietnam, Malázia no Indonézia foti hotu kuotasaun ne’ebé Korea Súl fó mai Timor-Leste tanba autoridade ho autoridade seidauk asina akordu iha programa foun ne’e.
“Entaun ida-ne’e mak agora ha’u la’o hela, halo liña koordenasaun ho iha nia governu atu nune’e bele halo autorizasaun mai hanesan autoridade bele halo akordu hamutuk ho autoridade Korea Súl, tanba sira-nia lei Korea Súl la autoriza liu husi meiu ‘G to G’,” nia katak.
“Sé ida-ne’e mak realiza ona, faze primeiru la’ós ita haruka kedas, sira-nia ekipa formadór-sira sei mai husi Korea Súl loke sentru formasaun hodi fó formasaun ba joven-sira durante fulan ida, depois joven-sira sei ba estájiu fila-fali mai mak kontinua kedas ba serbisu iha-ne’ebá ho nia sistema serbisu fulan-ualu, mai feriadu fulan tolu depois ba kontinua servisu fali,” nia konklui.
Enkuantu esforsu ne’ebé PAM Bobonaro halo ne’e ho objetivu redús númeru dezempregu iha rai-laran nune’e bele hadi’ak ekonomía família no nasaun.
Notísia relevante: PAM Bobonaro husu joven sira partisipa ativu iha prosesu dezenvolvimentu
Jornalista: Sérgio da Cruz
Editór: Evaristo Soares Martins
