2025, UNPAZ sei konstrui sintina no fatin lixu iha Bobonaro
BOBONARO, 26 agostu 2024 (TATOLI)-Universidade da Paz (UNPAZ) iha tinan akademíku sei haruka estudante 3,000 atu hala’o atividade prátika aprendizajen kampu iha munisípiu Bobonaro.
Reitór UNPAZ, Adomando Soares Amarál, informa liuhusi atividade ne’e iha Rejiaun Administrativa Espesiál Oe-Cuse Ambeno (RAEOA) tinan 2024 estudante 1,800 konsege konstrui ona haris-fatin, sintina ho fatin lixu hamutuk 700 no iha tinan oin iha munisípiu Bobonaro.
Nia subliña, estudante hirak-ne’e sei destaka iha suku no postu administrativu neen iha munisípiu Bobonaro hodi hala’o atividade rekolla dadus kona-bá problema ne’ebé akontese iha baze no atividade fíziku hanesan konstrui sintina no fatin lixu ho objetivu atu lori komunidade sira ba moris saudável.
Notísia relevante: Estudante UNDANA-UNPAZ halo asaun sosiál hodi prevene Dengue no Chikungunya
Adolmando fundamenta, osarmentu atu gasta ba atividade ne’e mai husi UNPAZ ne’ebé hetan apoia másimu husi família no inan-aman estudante sira.
“Papél universidade nia iha atividade prátika aprendizajen kampu mak konstrui hariis-fatin, sintina ida, fatin lixu ida ba komunidade sira-ne’ebé mak seidauk iha, mínimu tenke liuhusi 500 ka karik 1,000, sintina no fatin lixu liuliu ba sira-ne’ebé ke seidauk iha kondisaun,” nia hataten liuhusi intervensaun ba atividade entrega estudante estajiadu Fakuldade Saúde Públika no Siénsia Médika ba Autoridade Munisípiu Bobonaro, ne’ebé realiza iha salaun Maria-Tapo, segunda ne’e.
Nia dehan, hafoin finaliza prátika ne’e sei ba hala’o fali estajiy profesiál iha instituisaun Estadu iha nasionál hodi diskute ho makaer-ukun sira kona-bá problema ne’ebé komunidade sira enfrenta iha baze.
Prezidente Autoridade Munisípiu Bobonaro, Alexandrino Pires, agradese ba UNPAZ no prontu fó apoia másimu, tanba konsidera liuhusi programa akadémíku ne’ebé bele tulun família kbi’it laek sira ne’ebé durante ne’e moris ho kondisaun no kapasidade ekonomia mínimu.
Nia orienta diersaun Servisu Munisipál Saúde no seluk tan atu tún ba terrenu hodi identifika komunidade ne’ebé seidauk iha hariis-fatin, sintina no fatin lixu.
“Ita aproveita tanba UNPAZ mai haruka nia ema mak kaer servisu ho sira-nia osan rasik, tanba osan ne’ebé governu sentrál aloka mai sei la to’o atu responde problema ne’ebé ita nia inan-aman sira hasoru,” nia hateten.
Notísia relevante: UNPAZ utiliza subsídiu husi Governu hodi sosa mákina ba fakuldade enjeñaria
Jornalista: Sérgio da Cruz
Editór: Evaristo Soares Martins
