DILI, 07 agostu 2024 (TATOLI)—Governu liuhusi Ministériu Ensinu Superiór, Siénsia no Kultura (MESSK) atribui ona subvensaun públika ba universidade sira, nune’e Universidade da Paz (UNPAZ) utiliza osan referidu hodi sosa mákina ba fakuldade enjeñaria.
“UNPAZ hetan subvensaun públika purvolta 300.000-resin, entaun ami aprezenta ona programa, ne’ebé ami sei uza osan atu ajuda fakuldade enjeñaria no teknolojia agríkola atu halo produsaun ba mákina sira hanesan mákina ko’a maek, dulas kafé musan ba kafé u’ut, mákina dulas hare, depois iha mákina sira-ne’ebé atu teste ai-han sira. Nune’e, ami bele lori ba kompete ona iha merkadu,” Reitór UNPAZ, Adolmando Soares Amaral, informa iha ninia knaar fatin, kuarta ne’e.
Aleinde ne’e, sei uza osan subvensaun hodi instala aplikasaun hamate ahi, ne’ebé daudaun dezenvolve hela.
“Ami sei husu autorizasaun ba Governu para iha instituisaun sira la presiza hamate ahi ona ba manuál maibé liuhusi smartphone ema ida bele kontrola no bele hamate iha ofice sira, ne’e agora ami dezenvolve hela husi orsamentu ne’e no tinan oin ami lori ona ba merkadu,” nia akresenta.
Notísia relevante : Reitór UNPAZ: “garante kualidade edukasaun presiza investe iha rekursu umanu no infraestrutura”
UNPAZ daudaun simu ona subvensaun públika 40%, ne’ebé ezekusaun la’o hela, hafoin ezekuta hotu maka sei aprezenta fali proposta hodi husu tan 60%.
Vise-Reitór Asuntu Administrasaun Jerál no Rekursu Umanu iha Universidade Dili (UNDIL), Tomas Augusto Correia, hateten, universidade privada ne’e sei uza subvensaun ne’e ba konstrusaun laboratóriu, hola komputadór no projetór, nune’e bele fasilita estudante sira-nia atividade bainhira hala’o prátika.
“Ami daudaun ne’e hetan uluk 40%, depois ami ezekuta hotu lai maka sira transfere tan 60% bainhira planu hotu, ne’ebé ami aprezenta ne’e iha progresu,” Vise-Reitór katak.
Subsídiu husi Governu ne’e sira tau prioridade ba konstrusaun laboratóriu tanba kada tinan estudante aumenta ba beibeik.
“Laboratóriu ne’e iha, maibé tanba kada tinan estudante aumenta beibeik, entaun ita presiza harii tan nune’e bele fasilita liután estudante sira-nia prátika, tanba antes ne’e ami mós planu atu harii maibé tanba Governu fó subsídiu ona, entaun uza de’it osan Governu ne’e,” nia tenik.
UNDIL iha fakuldade neen hanesan Ekonomia, Direitu, Siénsia Polítika, Siénsia Saúde, Edukasaun no Tékniku, ho nia departamentu 12. Enkuantu, totál estudante ativu daudaun ne’e hamutuk 6.000-resin.
Ministru Ensinu Superiór, Siénsia no Kultura, José Honório da Costa Pereira Jerónimo, hateten, Governu apoiu subvensaun públika ba ensinu superiór sira ne’e hodi fasilita atividade iha universidade nune’e bele eleva kualidade edukasaun iha Timor-Leste.
“Ita fó apoiu signifika sira mós tenke fó buat ruma ba ita, sira fó buat ruma mak kualidade. Tanba ne’e mak ita apoiu subvensaun ba sira” MESSK, José Honório dehan.
Tanba osan ne’e povu nian, nune’e husu ba kada ensinu superiór bainhira hetan ona subvensaun tenke iha responsabilidade atu ezekuta ho didi’ak.
“Tanba faze dahuluk ne’e ita transferr uluk 40%, depois ita iha ekipa tékniku sira ne’ebé sei ba tuir atu haree oinsá sira-nia prosesu ba ezekusaun subvensaun, hafoin ita haree sira-nia progresu di’ak maka transfere tan 60% ba sira,” nia informa.
Jornalista : Osória Marques
Editora : Julia Chatarina
