DILI, 07 agostu 2024 (TATOLI)–Reitór Universidade da Paz (UNPAZ), Adolmando Amaral, sujere Governu liuhusi Ministériu Edukasaun (ME) tenke investe maka’as iha rekursu umanu no kompleta infraestrutura sira atu garante kualidade edukasaun iha ensinu superiór.
“Kona-ba Xefe Governu preokupa ne’e tanba nia hanoin atu oinsá ensinu superiór garante kualidade. Agora atu garante kualidade mak tenke garante infranstrutura, instituisaun sira tenke iha kondisaun mínima, infraestrutura sufisiente, fasilidade ba laboratóriu, biblioteka, no rekursu umanu. Tenke halo investimentu nafatin iha rekursu umanu nune’e ema sira-ne’e bele prodús estudante ho kualidade hodi serví rai no povu ida-ne’e,” Reitór hateten iha ninia knar fatin, UNPAZ, kuarta ne’e.
Akadémiku ne’e konsidera, kualidade edukasaun sai hanesan indikadór ida hodi halo sasukat.
“Agora ita haree took produtu husi universidade ne’ebé ita prodús, kada tinan fó graduasaun merkadu absolve ka lae. Agora ema barak serbisu no konsumu hela serbisu tantu iha rai-laran no rai-li’ur. Depois ita dehan kualidade laiha ne’e haree husi prepetiva ida-ne’ebé. Bainhira sira bá merkadu serbisu mak sira lahatene halo serbisu mak ita kestiona kualidade,” nia akresenta.
UNPAZ fó ona graduasaun ba ema hamutuk 15.000-resin, desde tinan 2007 to’o tinan kotuk.
“Ha’u ko’alia UNPAZ nian de’it, ami kada tinan sempre halo konferénsia ka kongresu ho antigu alunu sira. Ita-nia estudante graduadu hamutuk 15.000-resin iha tinan 2007 to’o 2023, ne’ebé ami husik iha sosiedade iha rai-laran no rai-li’ur, ne’ebé husi númeru ne’e, asesu ona ba kampu traballu 79%, enkuantu seidauk asesu ba kampu traballu 21%. Ida-ne’e kualidade, ha’u bele dehan UNPAZ la ba fatin-fatin maibé nia emar iha fatin-fatin,” Reitór katak.
Notísia relevante : PM Xanana konsidera kualidade ensinu superiór hasoru problema boot
Totál dosente iha UNPAZ hamutuk 411, ne’ebé na’in-40 ho nível douramentu no restante mestradu.
Universidade privadu ne’e akumula estudante ativa 16.000 no iha fakuldade neen hanesan ekonomia, direitu, siénsia sosiál no umana, saúde públika no siénsia médika, enjeñaria no teknolojia agríkola, ho nia departementu 25 ba lisensiatura iha doutoramentu na’in-rua.
Iha sorin seluk, Ministru Ensinu Superiór, Siénsia no Kultura, José Honório da Costa Pereira Jerónimo, rekoñese iha kestaun balun presiza hadi’a iha ensinu superiór.
“Kualidade ensinu superiór iha Timor-Leste iha problema duni no ita labele dehan laiha. Maibé ita la’o neineik gradualmente bele rezolve. Tanba ne’e mak Governu nia hakarak atu haree ensinu superiór,” nia tenik.
Governante ne’e akompaña, PM la’ós kestiona de’it kualidade universidade maibé husu mós ba ministériu relevante atu loke kursu importante sira.
“Se ko’alia kona-ba kualidade ema hotu hatene kualidade to’o iha ne’ebé, maibé Governu kontinua serbisu haka’as-an ho ita-nia ensinu superiór hotu, nune’e presiza ko’alia ba malu hodi aposta ba kualidade gradualmente, la’ós ohin ko’alia, ohin kedas realiza maibé buka solusaun hodi bele solusiona. Labele hanoin de’it fó gradua maibé hanoin mós prepara joven sira-nia kompetisaun atu nune’e bainhira serbisu ema bele haree sira-nia kompetisaun,” nia fó hanoin.
Jornalista : Osória Marques
Editora : Julia Chatarina
