PM Xanana konsidera kualidade ensinu superiór hasoru problema boot
BOBONARO, 28 juñu 2024 (TATOLI)-Primeiru Ministru (PM), Kay Rala Xanana Gusmão, konsidera kualidade ensinu superiór iha Timor-Leste hasoru problema boot tanba estudante sira iha ensinu superiór balun kópia de’it matéria husi Google.
“Ita-nia problema boot maka falta kualidade ensinu, ha’u ajuda ema barak, mas lubuk oan ida ba hori uluk kedas ba hetan buka aprende, sira buka hanoin hakerek, ohin loron Google hotu. Ida-ne’e iha UNDIL, UNTL no UNPAZ,” Xefe Governu ko’alia iha serimónia inaugurasaun sentru sosiál Padre Manuel Nunes Formigão, suku Tapo-Memo, sesta ne’e.
Xefe governu mós rekoñese profesór balun falta koñesimentu ba língua portugés, tanba durante mandatu IX Governu sei prepara buat hotu-hotu hodi eleva koñesimentu profesór iha língua ofisiál hodi garante prosesu enisnu idane’ebé loloos.
Nune’e jerasaun foun sira bele hatene saida mak sira presiza halo, tanba lian-portugés nudar identidade Timor-Leste nian.
“Profesór mak ne’e, sé ita eduka ema, atu forma ema, ba kaer rai ida-ne’e iha área hotu-hotu, hanesan tékniku, agrikultór, emprezáriu, membru Governu, Parlamentu Nasionál, sé laiha kualidade karik, ita forma ema la hún la dikin, ita sai problema boot, labarik sira bele haluha sira-nia identidade,” Xanana Gusmão hateten.
Primeiru Ministru apela ba estudante sira iha Timor laran tomak atu badinas estuda no aprende barak siénsia ho kualkér maneira atu nune’e ba futuru bele kontribui kapasidade ba dezenvolvimentu Timor-Leste.
Notísia relevante: PM Xanana konsidera lian Portugés nu’udar identidade kulturál no istóriku TL
Jornalista: Sérgio da Cruz
Editór: Evaristo Soares Martins
