DILI, 26 Agostu 2024 (TATOLI) – Ministériu Agrikultura, Pekuária, Peska no Floresta (MAPPF) prevee rihun $270 hodi konstrui uluk barreira mota iha tinan ne’e antes estabelese sentru matadouru iha Tíbar, tanba fatin ne’e harii besik mota.
Diretór-Jerál Pekuária no Veterinária, Carlos António Amaral, dehan konstrusaun barreira mota ne’e nia konkursu públiku finaliza ona no daudaun ne’e parte diresaun sei prepara atu bá vizita fatin referidu hodi deside prosesu konstrusaun tuirmai.
“Konstrui sentru matadouru ne’e besik kedan mota, ne’e duni diresaun deside loke prosesu konkursu públiku ida atu konstroi tiha barreira iha sentru ne’e atu udan karik labele fó ameasa ba fatin ne’e no bele asegura sentru matadouru Tibar ne’e iha futuru”, Carlos Amaral hateten ba Tatoli iha Comoro, ohin.
Tuir nia, bainhira harii ona sentru matadouru ka fatin abate animál iha 2025 bele garante ona na’an-karau ne’ebé kualidade, katak bainhira oho animál iha fatin ne’e no konsumidór sira han na’an ne’e sei la afeta ba saúde.
“Ita sei instala sentru matadouru ne’e ho kondisaun ida di’ak atu na’an sira ne’ebé sai husi fatin ne’e bele iha duni kualidade, katak garante saúde ba animál atu prevene moras ba ita-nia konsumidór sira”, nia asegura.
Carlos Amaral adianta katak bainhira fatin ne’e instala ona, sei sai mós hanesan merkadu ba animál no husi fatin ne’e sei hatama reseita ba Estadu.
“Kada karau komunidade nian ne’ebé iha sentru ne’e sei kona $7.50. Karik fulan ida maka matadouru ne’e oho karau 500 bele hatama reseita di’ak ba Estadu. Ne’e duni, planu ne’ebé ministériu kria ona, buka atu ajuda komunidade hodi fasilita fatin ba sira atu fa’an”, dehan.
Karau sira ne’ebé sei tama iha sentru matadouru ne’e sei koko uluk nia kondisaun, nune’e bele deteta karik moras sei labele oho atu la fó ameasa ba konsumidór sira.
Jornalista: Tomé Amado
Editora: Maria Auxiliadora
