OÉ-CUSSE, 26 Agostu 2024 (TATOLI) – Komando Polísia Nasionál Timor-Leste (PNTL), liuhusi Departamentu Tránzitu no Seguransa Rodoviária halo pasa-revista (auto-stop) no konsege halo apreensaun ba motorizada sia, tanba laiha dokumentu no laiha xapa mátrikula ka kontra Lei Kódigu Estrada.
Komandante PNTL Oé-Cusse, Superintendente Polísia, Nicolau Francelino da Costa, informa operasaun pasa-revista ne’e bazeia ba dekretu-lei númeru 6/2003, kona-ba Kódigu Estrada,
Tanba ne’e, Departamentu Tránzitu no Seguransa Rodoviária, lideradu husi Komandante Tranzitu, Inspetór Polísia, Yosep Sani Koa, halo apreensaun ba motorizada, tanba viola lei,
Notísia relevante: PNTL Oé-Cusse partisipa formasaun kona-ba atua situasaun hodi respeita direitu umanu
“Parte tránzitu sira hala’o operasaun ki’ikoan ida, liuliu ba motorizada sira-ne’ebé durante ne’e la uza xapa mátrikula iha motor oin no kotuk, laiha dokumentu no kontra sinál tránzitu, ka halai sala jalur. Tan ne’e, ohin konsege apreende motór ne’ebé daudaun ne’e sira prosesa hodi aplika koima hodi kontribui osan ba kofre Estadu”, Nicolau da Costa dehan iha komando PNTL Oé-Cusse.
Komandante ne’e adianta katak operasaun ne’e sei iha kontinuasaun, tan ne’e nia husu sidadaun hotu persiza kompleta dokumentu transporte, tanba atividade pasa-revista laiha kaléndariu no depende ba orientasaun komando PNTL nian.
Notísia relevante: Motorizada ilegál 1.919 iha Oé-Cusse hahú rejista atu hetan dokumentu
Tuir observasaun Tatoli, atividade pasa-revista ne’e hala’o iha sub-rejiaun Pante Makasar, iha suku Costa, iha via públika husi diresaun administrasaun Numbei tun bá rotunda merkadu tradisionál Numbei no kontinua to’o Aeroportu Palaban, iha aldeia Sanane nian.
Jornalista: Abílio Elo Nini
Editora: Maria Auxiliadora
