ME introdús estatutu ESJ Daraloi Iraler ba autoridade Uatulari
VIQUEQUE, 27 agostu 2024 (TATOLI)-Ministériu Edukasaun (ME), segunda ne’e, introdús kona-ba estatutu Ensinu Sekundáriu Jerál (ESJ) Daraloi Iraler, suku Matahoi, Postu Administrativu Uatulari, munisípiu Viqueque ne’ebé durante sai preokupasaun profesór no komunidade sira.
Inspitór Jerál husi Ministériu Edukasaun (ME), Rodolfo Henrinque Aparicio, esplika, kona-ba estatutu Ensinu Sekundáriu Jerál (ESJ) Daraloi Iraler ne’e iha pasadu ho estatutu sai ensinu sentrál, maibé foin lalais despaixu ME tun, muda ba Ensinu Sekundáriu Jerál (ESJ) sai hanesan filiál, nune’e halo komunidade no autoridade lokál sira preokupa.
“Tanba ne’e, maka ami mai ho ekipa ida hodi hodi ko’alia oinsa ita koloka prosesu estatutu ba ensinu sekundáriu no filiál nian tuir dalan ba autoridade, komunidade no profesór sira atu komprende kona-ba prosesu futuru sai sentral ka filiál tanba agora Ministériu sei prosesa”, Rodolfo Henrinque Aparicio, hateten ba jornalista sira, iha EGJ Daraloi, aldeia Iraler, segunda (26/08)
Estatutu ne’e, nia dehan la difikulta prosesu ensinu iha teritóriu tanba ME implementa ona, iha Dili mós Gabinete Avaliasaun Lisensiamentu no Akreditasaun (GALA) aplika prosesu ida-ne’e ba eskola sentrál no filiál hotu-hotu tantu privadu ka públiku sira.
Diretór ESJ no Autoridade Uatulari husu mantein ho estatutu eskola sentrál
Iha fatin hanesan, Diretór ESJ Daraloi Iraler, Jerimias Soares, hateten, ESJ Daraloi eziste iha tinan 2014 sai hanesan eskola sentrál, maibé agora eskola ida-ne’e ninia estatutu sai fali-filiál.
“Tanba ne’e, ha’u husu ME mantein estatutu ESJ Daraloi, mantein eskola sentrál tanba eskola ida-ne’e ninia filiál rua ida loke iha suku Macadique no ida seluk iha suku Vessoru”, nia afirma.
Nune’e mós, Administradór Postu Uatulari, Jorge Ribeiro, prefere ba ME hodi mantein estatutU ESJ Daraloi nu’udar eskola sentrál tanba primeiru distánsia ne’ebé do’ok husi vila purvolta kilométru 25 no agora loke ninia filál rua.
“Tanba ne’e lori autoridade postu Uatulari husu ME mantein estatutu anteriór. Tanba eskola ida-ne’e, ajuda ESJ Sabika Besik Kulit Uatulari redús problema sira-ne’ebé akontese bei-beik. Maibé, ESJ loke tiha ninia filiál ohin-loron ita haree problema iha eskola ESJ Xabika Besi Kulit laiha tiha ona. Tan ne’e mak ami husu, ME hala’o prosesu avaliasaun tuir lei, maibé labele muda ba Filiál”, nia afirma.
Tuir dadús estudante Daraloi totál hamutuk na’in-152 kompostu husi klase 1 to’o klase 3, filiál Macadique 92 no filiál Vessoru hamutuk na’in-87.
Jornalista : Vitorino Lopes da Costa
Editór : Florencio Miranda Ximenes
