DILI, 27 agostu 2024 (TATOLI)–Ministériu Edukasaun (ME) asina akordu ho Ministériu Saúde (MS) kona-ba programa importante haat hanesan saúde eskolár, edukasaun inkluzivu, saúde orál no nutrisaun.
Ministra Edukasaun, Dulce de Jesus, hateten, akordu ne’e hanesan marka signifikativu ida-ne’ebé subliña kompromisu konjunta ba moris di’ak no dezenvolvimentu integradu ba labarik no joven sira.
“Kontente tebes, tanba ekipa rua ne’e konsege serbisu hamutuk hodi bele realiza asinatura nota entendimentu ida-ne’e tanba ho objetivu atu lori programa saúde eskolár ne’e ba eskola sira,” Ministra informa iha ninia diskursu, ne’ebé Agência Tatoli asesu, tersa ne’e.
Notísia relevante : IMTSA diskute ho liña ministeriál kona-ba seguransa ai-han no nutrisaun
Responsabilidade programa saúde eskolár inklui saúde orál no nutrisaun sai nu’udar responsabilidade ME no MS hodi foka ba saúde eskolár hodi kontinua serbisu tuir padraun no polítika ne’ebé operasionaliza husi MS.
Iha fatin hanesan, Ministra Saúde, Elia dos Reis Amaral, hateten, saúde eskolár nu’udar pilár esensiál ida iha formasaun ba jerasaun sira iha futuru, labarik no adolesente sira-nia moris-di’ak ba fíziku, kognetivu no psikolójiku la’os de’it forma sira-nia viajen pesoál, maibé mós reflete diretamente kona-ba dezenvolvimentu iha sosiedade.
“Ohin loron, ita selebra kolaborasaun ne’ebé sei hametin no habelar ita-nia abilidade atu promove saúde eskola ne’ebé forte no integradu, ambiente eskola ne’ebé promove saúde mentál no emosionál, oferese apoiu psikolójiku no jere estrese no laran-susar bele hasa’e kapasidade inteletuál ba ita-nia joven sira. Integrasaun estratejia saúde mentál iha eskola sira permite estudante sira atu hasoru dezafiu akadémiku no pesoál ho reziliénsia no konfiánsa boot liu,” Ministra tenik.
Jornalista : Osória Marques
Editora : Julia Chatarina
