Membru PN husu parte kompetente sensibiliza foinsa’e sira prevene kazu soe bebé

DILI, 27 agostu 2024 (TATOLI)—Membru Parlamentu Nasionál (PN) liuhusi Deputadu CNRT, José Virgílio, husu ba parte kompetente sensibiliza foinsa’e sira iha família, sosiedade no eskola kona-ba edukasaun seksuál no reprodutivu, hodi prevene kazu soe bebé iha Timor-Leste.
Notísia Relevante: ANCI-TL rejista kazu soe bebé hamutuk 58 iha tinan 2015-2023
“Governu, organizasaun sosiedade sívil ba feto sira, ba autoridade lokál sira no iha eskola sekundáriu no universidade, presiza hala’o sensibilizasaun no edukasaun sívika makaas, hodi prevene kazu soe bebé ba joven foinsa’e sira estraga sira-nia futuru ba soe bebé. Ba família, presiza iha kontrola ne’ebé di’ak husi inan no aman,” Nia hateten ba jornalista sira iha resintu Parlamentu Nasionál, tersa ne’e.
Tanba, tuir nia, kazu soe bebé ne’ebé kontinua akontese iha Timor-Leste, hanesan inan feto ida-ne’ebé tenta atu soe nia bebé iha valeta laran iha área eis merkadu Comoro, aldeia 05 de Maio, suku Fatuhada, postu administrativu Dom Aleixo, munisípiu Dili, maibé komunidade ne’ebé hela besik iha fatin ne’eba konsege salva lori bebé ne’e ho nia inan ba ospitál hodi hetan tratamentu.
Tanba ne’e, husu autoridade polísia presiza halo investigasaun ba kazu ne’e inklui investiga mós mane ne’ebé fó oan ba feto ne’e hodi prosesa tuir dalan legál ne’ebé iha, tanba soe bebé ne’e krime tenke iha responsabilidade kriminál.
Antes ne’e, Prezidente Grupu Muller Parlamentár (GMPTL), Aliança da Conceição, husu Governu atu kolabora ho parte relevante sira hodi haforsa sensibilizasaun kona-ba edukasaun seksuál ho edukasaun reprodutivu ba joven sira hodi kombate kazu soe bebé iha rai-laran.
Notísia Relevante: GMPTL preokupa kazu soe bebé-haforsa sensibilizasaun ba foinsa’e sira
Jornalista : Nelson de Sousa
Editór : Cancio Ximenes

