BOBONARO, 28 agostu 2024 (TATOLI)-Hahú husi fulan janeiru to’o loron 27 fulan-agostu tinan 2024 ne’e Polísia Nasionál Timor-Leste (PNTL) liuhosi Seksaun Tránzitu Roduviária Munisípiu Bobonaro, halibur reseita hamutuk $32,544 hodi kontribui ba kofre estadu.
Komandante Seksaun Tránzitu Roduviária Munisípiu Bobonaro, Sarjentu João Belo, informa reseita hirak-ne’e halibur husi infratór 700 tanba viola regra tránzitu.
Notísia relevante: Janeiru-juñu, PNTL Bobonaro halibur reseita rihun $20-resin
“Ninia aplikasaun koima iha $32,544, infratór sira-ne’e dokumentu mate, la uza kapasete, la uza asesoris ba viatura, monta kanu-resin,” nia aprezenta relatóriu ne’e iha atvidade enkontru Konsellu Seguransa Munisipal ne’ebe realiza iha Kuartél PNTL Munisípiu Bobonaro, tersa ne’e.
Entertantu hahú husi janeiru-jullu ne’e mós PNTL Bobonaro rejista asidente tráfegu hamutuk 58, hosi númeru ne’e rezulta ema na’in-lima mate no restante kanek.
Nia dehan, asidente tráfegu ne’e akontese mai husi fatór umanu.
“Talvez ansiozu, hakarak ba lalais, lahatene konsidaun veíkulu ne’ebé nia uza, depois kondisaun lanu, tuir fali seidauk iha koñesimentu oinsá atu kondús motorizada no karreta,” nia hateten.
Atu prevene kazu asidente tráfegu, seksaun tránzitu roduviária no eskuadra postu administrativu sira halo sensiblizasaun ba komunidade kona-bá dekretu-lei kódigu estrada no kódigu penál artigu 227-229.
Duarnte ne’e Polísia Munisípiu Bobonaro identifika estrada públiku ne’ebé risku ba asidente, hahú iha postu administrativu Lolotoe to’o Ozo, xubida parte Oe-leu, lahomea, tún ba postu administrativu Balibo ne’ebé iha kurva barak to’o Manduki.
Jaoa Belo informa, estrada ho kondisaun di’ak hahú husi Mota-Ain, Miguir ba to’o ponte Loes.
Seksaun Tránzitu mos identifika estrada urbana husi Mau-Mali-Ritabou sa’e mai to’o Mugis, suku Raifun ho kondisaun seidauk iha espasu ba ema la’o-ain.
“Ema-nia la’o fatin laiha, hamosu engrafamentu beibeik, liuliu iha kapela Kodim oin, kuandu iha domingu misa, sempre mosu engrafamentu. Motór para fatin iha-ne’ebé, karreta para fatin iha-ne’ebé, trankadu loos, ami husu ita hotu-hotu atu toma atensaun ba ida ne’e,” nia fó hanoin.
Notísia relevante: Vizita Papa Francisco, PNTL Bobonaro sei kontrola transporte ho rigorozu
Jornalista: Sérgio da Cruz
Editór: Evaristo Soares Martins
