BOBONARO, 18 jullu 2024 (TATOLI) – Polisia Nasionál Timor-Leste (PNTL) munisípiu Bobonaro liuhosi seksaun tránzitu roduviáriu sei halo kontrolu ho rigorozu ba transporte karreta no motorizada ne’ebé atu partisipa Sua Santidade Papa Francisco iha Tasi-Tolu, munisípiu Dili ne’ebé sei realiza iha fulan-setembru tinan 2024.
Segundu Komandante PNTL Munisípiu Bobonaro, Asistente Superintendente Joel Casemiro de Carvalho, informa polísia presiza halo kontrolu tanba movimentu sarani hosi parókia ba munisípiu to’o Dili ne’e sei maka’as.
Notísia relevante: Zona fronteirisa sei hetan kontrolu másimu iha ámbitu vizita Amu Papa
“Motór (motorizada) ho karreta sira-ne’ebé rejistadu atu halo movimentu ami sei revista hotu tanba ne’e tula ema, ami sei haree karreta nia kondisaun, haree motorista sira-nia karta kondusaun ne’e apár duni nia atu lori karreta ida-ne’e duni ka lae, ami sei halo kontrola ida ke rigozoru,” nia hateten iha edifísiu STAE munisípiu Bobonaro, kinta ne’e.
PNTL Bobonaro mós sei taka stiker ba karreta ho motorizada sira, tanba ne’e nia husu ba komunidade sira-ne’ebé atu partisipa tenke rejistu ho onestu iha komisaun.
“Karreta ho motór ne’ebé atu sai hosi munisípiu ne’e ami tenke iha dadus kompletu, atu nune’e bele asegura movimentu ida-ne’e, seguransa ne’e ami sei hahú husi postu neen ba to’o iha Loes,” nia katak.
Notísia relevante: PNTL Bobonaro preparadu garante seguransa ba vizita Amu Papa
Jornalista: Sérgio da Cruz
Editór: Evaristo Soares Martins
