BOBONARO, 17 main 2024 (TATOLI)-Polísia Nasionál Timor-Leste (PNTL) komandu munisipiu Bobonaro, lideradu Superintendente Xefe Agustino Gomes da Silva, preparadu atu garante seguransa ba sarani sira durante vizitasaun Amu Papa iha Tasi-Tolu Dili.
Komandante PNTL munísipiu Bobonaro, Superintendente Xefe, Agustino Gomes da Silva, fó sai ona avizu ba komandante eskudara no seksaun sira hotu atu bele prepara-an hodi hasoru eventu importante ne’e.
Notisia relevante: Komandu PNTL diskute planu operasaun ba vizita Amu Papa
“Atu hala’o servisu ida-ne’e komandu munísipiu Polísia Bobonaro prontu, ha’u sei uza rasik hau sei uza esperiénsia ki’ik tanba amu Papa Joao Paulo II vizita Tasi-Tolu, ha’u mos partisipa ne’ebé oinsá ita sei halo eskoltu ba sarani sira husi estasaun Gleno mai Ermera ba to’o Tasi-Tolu, oinsá Polísia asegura sarani sira-nia hela-fatin, depois fatin sira hela oinsá, Polísia asegura propriedade sarani sira-nia.”
Preparasaun ne’ebé daudaun ne’e Komandu PNTL munísipiu Bobonaro halo mak hanesan halo patrullamentu intensivamente iha liña fronteira, hodi bele deteta no indetifika karik iha indikasaun ba ameasa ruma mai territóriu Timor-Leste relasiona ho vizia Santu padre.
Komandu Polísia Bobonaro mós halo ona aprosimasaun ho parte Igreja atu hatutan informasaun ba komunidade sira.
“Igreja bele fó-sai iha misa nune’e komunidade hotu bele iha koñesimentu, nune’e karik iha sinál no indikasaun ruam relasiona ho vizita Amu Papa mai Timor bele informa ba Polísia.”
Komandante PNTL munísipiu Bobonaro, Superintendente Xefe Agustino Gomes hato’o liuhusi entrevista eskluziva ho Ajensia Tatoli, kinta ne’e.
PNTL Bobonaro mos sei halo inkontru koordenasaun ho parte Dioseze Maliana no Autoridade Munisipál hodi diskute planu seguransa atu akompaña mobilizasaun sarani sira husi Parókia sira konsentra iha Maliana iha Tasi Tolu Dili to’o fila mai Maliana.
Atu konklui Komandante Agustino Gomes, apela ba sarani liu-liu joven sira iha munisípiu Bobonaro atu prepara-aan didiak no evita komflitu, labele envolve-an iha aktu krime durante vizitasaun Santu Padre mai Timor-Leste.
Notisia relevante: Vizita Amu Papa, Komandu PNTL sei dada membru sira munisípiu hodi haforsa
Jornalista: Sérgio da Cruz
Editór: Evaristo Soares Martins
