DILI, 16 maiu 2024 (TATOLI) – Segundu Komandante Jerál Polísia Nasionál Timor-Leste (PNTL) Komisáriu Polísia, Pedro Belo, prezide reuniaun hamutuk ho Ofisiál Superiór PNTL hodi diskute ba planu operasaun vizita Sua Santidade Papa Francisco.
“Ohin ha’u halo enkontru ho komandante sira, ha’u bolu sira mai iha ne’e hodi diskute kona-ba kestaun seguransa liuliu ita bo’ot haree iha kalan kalan dala ruma mosu konfrontu, tanba ne’e ami bolu malu mai iha atu haree asuntu ida-ne’e. Ha’u orienta ona ba komandante sira tenke intensifika seguransa iha tempu kalan atu nune’e bele atua ho di’ak no lalais kuandu mosu konflitu sira hodi prevene krime sira atu komunidade bele sente seguru. Asuntu seluk ida ami koalia kona-ba planu operasaun ba vizita Amu Papa nian”, Komisáriu Polísia, Pedro Belo hateten ba jornalista sira iha Komandu Jerál PNTL Caicoli, kinta ne’e.
Belo hateten, vizita Papa nian, PNTL afirma nia pozisaun bebeik katak Polísia Nasionál fó seguransa ba vizita Papa Francisco nian mai Timor-Leste.
“Ha’u dehan ona bebeik katak PNTL ne’e preparadu atu fó seguransa ba vizita Papa Francisco nian mai Timor-Leste”, nia adianta.
Segundu Komandante Jerál ne’e subliña, PNTL sei uza rekursu tomak atu bele fó seguransa másima ba vizita Amo Papa, nune’e vizita ne’e bele lao di’ak no susesu.
“Kona-ba rekursu ita laiha problema tanba membru PNTL ne’ebé ita iha sei fó apoiu ne’ebé másimu ba vizita ne’e. Ita sei haree membru ne’ebé mak iha fíziku di’ak, ita sei dada mai hodi reforsa seguransa ba vizita Amo Papa nian”, nia afirma.
Nia dehan, kona-ba fasilidade sira hanesan karreta operasionál ba PNTL mak dadaun ne’e sei menus maibé iha tempu badak nia laran Komandu Jerál PNTL sei husu ba Governu atu halo akizisaun nune’e bele reforsa servisu PNTL nian iha terenu hodi fó seguransa ba vizita Amu Papa nian.
Jornalista: Natalino Costa
Editór : Zezito Silva
