Pe. Guilhermino: Sarani sira bele asesu testu misa portugés liuhusi rede sosiál
DILI, 28 agostu (TATOLI)–Vise kordenadór ba vizita Amu Papa husi igreja no atuál paróku igreja SantoAntónio Motael, Pe. Guilhermino da Silva, hateten komisaun organizadora emprime textu livriñu iha dalen portuges no disponibiliza testu ne’e iha rede sosiál atu sarani sira bele akompaña misa solene ne’ebé Papa Francisco prezide ho lian portugés, iha 10 setembru 2024 iha Tasi-Tolu.
Notísia Relevante: Papa prezide misa iha lian Portugés-orasaun universál lee iha dialeitu 6
“Testu ba livrinu sira-ne’e prodús hotu ona no bele fahe mós iha eletronika liuhusi WhatsApp, tanba maluk barak mak laiha testu misa portugés iha parokia sira. Entaun, ita-nia maluk sira presiza akompaña iha no WhataApp, Facebook no You Tube idai-dak ba download iha momentu selebrasaun misa, tanba livriñu lato’o ba ema hotu,” Vise kordenadór ba vizita Amu Papa husi igreja ne’e hateten ba Agência Tatoli, iha Tasi-Tolu.
Nia esplika livriñu la to’o ba ema hotu bele hetan, tanba ne’e mak sarani sira bele asesu mós meiu komunikasaun sosiál hodi bele akompaña misa.
“Sarani sira iha ema rihun atus ba atus mak se tuir misa, entaun ita labele prodús livru ida-idak ba sira, maibé ema balun de’it mak hetan,” nia hateten.
Tuir nia, produsaun ba testu ba livriñu ne’e presiza rekursu finanseiru, tanba ne’e utiliza midia sosiál ne’e mós importante ba ema hotu atu asesu testu ne’e.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
