Sekretáriu-Jerál ONU fiar prezensa TL iha ASEAN bele lori dame ba Myanmar

DILI, 29 agostu 2024 (TATOLI)—Sekretáriu Jerál Organizasaun Nasaun Unida (ONU), António Guterres,  fiar katak Timor-Leste nia prezensa iha Asosiasaun Nasaun Sudeste Aziátiku (ASEAN) sei iha papél importante hodi lori dame ba Myanmar.

“Timor-Leste nu’udar membru Organizasaun Mundiál Komérsiu (OMK), Timor-Leste nu’udar fundadór ba g7+ ho influénsia ne’ebé aumenta ba beibeik iha diskusaun sira iha komunidade internasionál no nível ONU nian. Timor-Leste iha tempu badak sei sai membru ASEAN, iha ne’ebé ha’u hein atu hala’o kna’ar ida ne’ebé importante tebes atu bele lori dame ba povu Myanmar iha Myanmar,” António Guterres hateten ba jornalista sira iha Palásiu Governu Dili, kinta ne’e.

Notisia relevate:António Guterres: ONU kontinua apoia Timor-Leste hodi luta ba liberta povu

Nia dehan, Timor-Leste hanesan lian ida ne’ebé respeita tebes iha ONU, no prezensa nasaun nian iha Simeira Futuru (Konferénsia Nivel Aas) iha Nova Iorke iha fulan setembru mai ne’e importante tebes.

“ONU sei buka atu diskute reforma importante sira atu instituisaun multilaterál sira bele hatán ba problema atuál sira, mudansa klimátika, dezafiu sira intelijénsia artifisiál nian no nia multiplikasaun no mós norma sira konflitu nian ne’ebé eziste iha mundu tomak,” nia tenik.

António Guterres dehan tan, “Ita konta ho Timor-Leste nia lian iha simeira ne’ebé sei mai, ita konta ho Timor-Leste nia lian iha esforsu tomak atu halo ita-nia mundu sai mundu ida ne’ebé respeita karta ONU, respeita lei internasionál, no respeita lei internasionál iha ne’ebé dezigualdade no injustisa sira ne’ebé kontinua, ikus mai bele hetan konfrontu ho determinasaun no solidariedade,” nia hateten.

Iha 18 Abril 2024, Timor-Leste afirma nia apoiu ba ASEAN atu hapara violénsia, kaer metin lei umanitáriu internasionál, no proteje ema sivíl hotu-hotu, inklui sidadaun estranjeiru sira.

Ida-ne’e hatudu katak Timor-Leste la’ós de’it preokupa ho situasaun iha Myanmar maibé mós koko atu enkoraja asaun koletiva hosi organizasaun rejionál sira.

Governu Timor-Leste, liuhosi deklarasaun sira responsável aas sira hanesan Primeiru-Ministru, Xanana Gusmão no Prezidente Repúblika, José Ramos Horta, kritika ona abertamente rejime militár Myanmar nian no husu nesesidade atu rezolve krize direitu umanu nian .

Notisia relevate:Antonio Guterres: ONU kontinua fó apoiu ba aspirasaun povu Timor-Leste

Jornalista: Hortencio Sanchez

Editór: Florencio Miranda Ximenes