António Guterres: ONU kontinua apoia Timor-Leste hodi luta ba liberta povu
DILI, 29 agostu 2024 (TATOLI)— Sekretáriu Jerál Organizasaun Nasaun Unida (ONU), António Guterres hateten, Timor-Leste agora tenke luta maka’as hodi liberta povu liuhusi halo dezenvolvimentu Estadu.
António Guterres hato’o lia hirak ne’e bainhira hala’o reuniaun ho Primeiru-Ministru, Kay Rala Xanana Gusmão, iha Palásiu Governu Dili, kinta ne’e.
Notisia relevante:Antonio Guterres: ONU kontinua fó apoiu ba aspirasaun povu Timor-Leste
Lider ONU dehan, entre grupu rezisténsia timoroan ne’ebé lidera husi Xanana Gusmão no Governu Portugál iha negosiasaun ne’ebé ikus mai lori ba prosesu autodeterminasaun.
“Ida ne’e depois lori ba transformasaun Timor-Leste ba nasaun independente, demokrátiku, respeita direitu umanu, no nasaun ida ne’ebé afirma-an iha nivel internasionál ho influénsia ne’ebé aumenta ba beibeik”, Sekretáriu Jerál ONU tenik.
Tuir nia, Timor-Leste manán ona funu ba independénsia, manán luta ba demokrásia, orgullu katak ONU hamriik sorin-sorin ho povu Timor-Leste iha luta ba ukun rasik-an no konsolidasaun demokrásia .
“Maibé Timor-Leste agora tenke manán funu dezenvolvimentu nian. Ne’e signifika katak ONU, iha nia kapasidade ne’ebé limitadu ho kompromisu tomak, apoia tomak Governu Timor-Leste, atu nune’e tuir estratéjia Governu Timor-Leste nian, ONU bele apoia vitória ba batalla dezenvolvimentu nian,” nia hateten.
Antigu Primeiru-Ministru Portugal ne’e, impresionadu ho Primeiru-Ministru Xanana Gusmão nia deskrisaun kona-ba kompromisu ba esforsu foun sira kona-ba seguransa ai-han no investimentu iha agrikultura ne’ebé konserteza sai hanesan dezafiu krusiál ida ba susesu estratéjia dezenvolvimentu nian.
Iha fatin hanesan Primeiru-Ministru, Xanana Gusmão hateten, António Guterres hanesan ema ida ne’ebé kontribui mós ba Timor-Leste nia independénsia.
“Iha tempu ne’ebá Sekretáriu Jerál António Guterres nu’udar Primeiru-Ministru Portugal enkoraja Portugál nia partisipasaun iha negosiasaun iha ONU no iha loron 05 fulan-maiu asina ona akordu ho Indonézia hodi hala’o referendum. Ami agradese ba apoiu la’ós de’it husi Governu Portugál iha ne’ebé António Guterres hanesan Primeiru-Ministru iha tempu ne’ebá maibé mós ba povu portugés tanba sira-nia solidariedade ne’ebé halo ita fiar-an katak ita bele ukun-an,” Xanana tenik.
Durante enkontu parte rua ko’alia mós kona-ba relasaun entre Timor-Leste ho ONU, iha ne’ebé Sekretáriu Jerál komprometidu atu enkoraja dezenvolvimentu iha Timor-Leste.
Notisia relevante:PR Horta kondekora António Guterres ho Orden Timor-Leste Grande-Colar
Jornalista: Hortencio Sanchez
Editór: Florencio Miranda Ximenes
