DILI, 30 agostu 2024 (TATOLI)–Ema ho defisiénsia, Madalena da Costa, konsidera komemorasaun loron Konsulta Populár 30 agostu hanesan reflesaun ba jerasaun foun sira.
“Iha momentu di’ak no a’at iha hotu laran tanba povu kontente hodi deside hamriik mesak no liuhusi pregu oan ida no triste tanba bainhira rona rezultadu eleisaun iha momentu ne’ebá, tanba Indonézia rona rezultadu eleisaun katak ita independénsia ona no husi ne’e kedas ema halo asaun oin-oin to’o povu barak lakon uma inklui lakon vida. Ida-ne’e sai hanesan istória ida ba ita joven jerasaun tuir mai atu nafatin lembra istória ida-ne’e hodi konta tutan ba jerasaun tuir mai ne’e,” Madalena da Costa, hateten ba Agência Tatoli, sesta ne’e.
Notísia relevante : Dom Norberto: “Konsulta Populár hanesan kakuluk harii uma ida”
Tanba ne’e, nia parte rekomenda ba Estadu no Governu hodi foka ba dezenvolvimentu nasionál nune’e ema hotu bele sente ukun rasik-an tanba to’o agora povu balun seidauk sente dezenvolvimentu, liu-liu ema ho defisiénsia ne’ebé falta rampa públiku.
“Maibé iha loron Konsulta Populár ne’e presiza halo reflesaun ida ba ita hotu, liu-liu ba Governu tenke halo dezenvolvimentu ba rai ida-ne’e, liu-liu ba ami ho kondisaun defisiénsia. Tinan 25 ba kotuk oinsá, agora oinsá no ba oin oinsá. Presiza tau planu nune’e bele lori dezenvolvimentu ba rai ida-ne’e,” nia akresenta.
Nune’e mós, Ema ho defisiénsia, Joãozito dos Santos, husu ba Estadu atu tau-atensaun mós ba ema ho defisiénsia sira.
“Tinan 25 Konsulta Populár ita hakarak asegura inkluzaun iha sosiedade no ita hakarak inkluzaun iha defisiénsia ne’ebé hola parte iha dezenvolvimentu nasionál. Tanba sidadaun hotu iha direitu hanesan ne’ebé konsagra iha Konstituisaun artigu 21,” nia tenik.
Joãozito dos Santos dehan, povu sira antes ne’e lori pregu ba tuu hodi deside hamriik mesak ne’e inklui mós ema ho defisiénsia nia kontribuisaun, tanba ne’e ohin timoroan tomak komemora loron istóriku ne’e.
Jornalista : Osória Marques
Editora : Julia Chatarina
