VIQUEQUE, 30 agostu 2024 (TATOLI)- Iha ámbitu komemosaun loron Konsulta Populár, Inspitór Jerál husi Ministériu Saúde (MS), Horacio Fernandes Ribeiro, husu jerasaun foun postu administrativu Uatulari, munisípiu Viqueque tenke buka hatene istória ba prosesu ukun rasik-aan husi inan amán sira konta hodi banati tuir atu hamutuk luta ba liberta povu husi ki’ak no mukit.
“Konsulta Populár 30 agostu 1999 iha Timor Leste, iha momentu ne’ebá povu sai husi uma ba fatin sentru votasaun hodi duni okupante sira ho pregu. Iha loron istória ida-ne’e ba jerasaun foun sira tenke hakbesik-an ba ita-nia inan amán sira hodi konta ba imi atu imi bele hatene ita-nia prosesu ukun rasik an nune’e bele banati tuir iha prosesu konstrusaun dezenvovlimentu iha ita-nia rain”, hateten Horacio Fernandes Ribeiro, iha ninia diskursu, ámbitu komemorasaun, iha postu administrativu Uatulari, ohin.
Ba ukun raik an ida-ne’e, povu maka lori pregu tu’u hodi determina dalan ba liberdade no ukun rasik an.
“Ohin loron 30 agrstu 2024, iha teritóriu timor laran tomak povu selebra loron istóriku ba dala-25 hodi festeza no relembra hikas saida mak akontese iha loron 25 liuba akontese iha ita-nia rai doben Timor Leste. Nasaun barak la fiar ita-nia funu, maibé povu Timor Leste hatudu ba mundu katak ita iha mehi, fiar, saida mak ita hakarak, maske timor-oan liu rihun atus tolu fakar raan, ruin naklekar ho objetivu ida de’it Timor Leste tenke ukun rasik an. Tan ne’e, komadante em-xefe Xanana Gusmão sempre dehan povu maka eroi”, nia subliña
Nune’e ba selebrasaun loron referendum tinan ida-ne’e, “Ita hotu sei buka hatene istória husi ferik katuas sira hodi hametin memoria rezisténsia Timor Leste ne’ebé ùniku iha mundu. Ohin, ita goja moris iha liberdade nian laran tanba ferik katuas sira no maun alin sira iha loron 30 agostu 1999 la tauk mate husi sira-nia uma ba hamrik hodi hatudu sira-nia deseju fiar ba ukun rasik an”, nia relembra.
Iha fatin hanesan, Prezidente Komisaun Organizadóra ba selebrasaun loron Konsulta Populár postu administrativu Uatulari, João Lemos, relata atividade komemorasaun ne’e realiza tanba hetan apoia finanseiru husi Governu sentrál ho totál hamutuk $3,000.00.
“Osan sira-ne’e ami fahe ba atividade sira hanesan ativade desportu, sertame no kompetisaun dansa kultura, kompetisaun kantiku loron to’o ona entre estudante no seluk tán. Ho ativdade sira-ne’e hodi festeza loron konsulta popular iha postu Uautlari”. Nia relata.
Iha selebrasaun ne’e hetan partisipa husi autoridade, veteranu, funsionáriu, autoridade lokál, estudante no komunidade postu Uatulari.
Jornalista : Vitorino Lopes da Costa
Editór : Florencio Miranda Ximenes
