BOBONARO, 30 agostu 2024 (TATOLI)-Governu liuhusi Ministériu Justisa, instala ona mákina prodús pasaporte unidade rua iha edifísiu Diresaun Jerál Servisu Rejistu Notariadu Kolmera, Munisípiu Dili hodi prepara atu halo imprensaun kaderneta pasaporte ba sidadaun hotu iha Timor-Leste.
Mákina (IXLA XP2HD printer) sistema gravasaun laser desktop no asessor ho enerja 10w no teknolojia DPSS diode solid state pumped) ne’e Governu sosa husi nasaun Finlándia.
Notísia relevante: Empreza Thales no ekipa tékniku konklui ona instalasaun mákina produsaun Pasaporte
“Mákina IXLA imprimidór ne’ebé ita atu prodús ita-nia kaderneta hodi bele atribui pasaporte ba ita-nia sidadaun sira no mós ba ita-nia dokumentu ofisiál estadu nia, prontu ita laiha dívida, ita hakarak hakonu ida-ne’e ho responsabilidade, nakonu ho matenek, nakonu ho vizaun, ikus liu povu hakmatek no haksolok. Ida-ne’e mak ita-nia interese, ita-nia serbisu orientadu,” nia informa ba Jornalista sira, hafoin sai inspetór serimónia komemorasaun konsulta populár 30 agostu ba da-25 iha postu administrativu Bobonaro, sesta ne’e.
Ministru Sérgio Hornai hatutan, daudaun ne’e ekipa Tékniku sei halo hela konetividade no sei fasilita formasaun ba sira atubele operasionaliza mákina ne’e.
“Serbisu sira-ne’e la’o, ha’u husu ba mídia, ita-boot sira ita kolabora ba malu, ita iha idak-idak nia fatin, mas ita kontribui ba malu, atu diresiona ita-nia polítika ba iha ita-nia prestaun serbisu ida ho kualidade ba ita-nia rai,” nia hateten.
Eis Komisáriu Komisaun Antí Korrupsaun ne’e, informa, Governu halo esforsu ne’e atubele presta serbisu ida ke ho kualidade no loloos ba sidadaun-sira.
“Buat sira-ne’e ki’ik-oan, ki’ik-oan ita komesa hakat, ami iha responsabilidade atu haree sasán sira-ne’e ho oituan-oituan, mas ita kaer ho kuidadu atu ba beibeik,” Ministru Sérgio konklui.
Enkuantu Governu kontrata empreza Thales hodi halo akizisaun ba mákina ne’e ho orsamentu millaun $2.
Notísia relevante: Governu halo ona pagamentu ba mákina imprensaun Pasaporte
Jornalista: Sérgio da Cruz
Editór: Evaristo Soares Martins
