DILI, 17 abríl 2024 (TATOLI) – Ministru Justisa Sergio Hornai, dehan Ministériu Justisa halo ona pagamentu ba mákina rua ne’ebé halo imprensaun ba kaderneta Pasaporte ho naran Isla ne’ebé Empreza Thales halo hela iha Finlandia.
Governu preve millaun $2 hodi halo akizisaun ba mákina rua ba imprensaun Pasaporte nian.
“Prosesu ba akizisaun mákina ba imprensaun Pasaporte, hanesan ita bo’ot sira hatene iha semana kotuk, ha’u koalia tiha ona katak prosesu ita akompaña namanas, iha faze ikus ita halo ona prosesu pagamentu sira. Empreza ho ita-nia Governu halo hela esforsu para bele lalais no mákina ne’e bele mai”, Sergio Hornai hateten ba jornalista sira hafoin remata reuniaun Konsellu Ministru iha Palásiu Governu, kuarta ne’e.
Tuir nia, mákina rua seidauk bele to’o Timor-Leste maibé bainhira iha ne’e ona mak sei instala teknikamente ho nia konetividade.
“Ha’u labele promete katak mákina ne’e sei mai iha tempu badak. Maibé ha’u hateten bebeik katak ita halo esforsu ida másimu para mákina ne’e to’o. Ha’u labele garante katak bainhira mak mákina ne’e atu mai, ida-ne’e perigu, tanba mákina ne’e, ita sosa iha loja karik ohin ne’e to’o kedas, laos hanesan ne’e mak ita hakarak. Maibé ita hakarak ne’e kualidade empreza halo tiha mákina ne’e depois instala tiha kedan fasilidade para iha imprensaun aban bain rua labele iha problema”, nia adianta.
Rekorda fali katak reuniaun Konsellu Ministru aprova proposta ne’ebé aprezenta hosi Ministru Justisa Sergio Hornai atu halo akizisaun ba mákina rua ba imprensaun Pasaporte nian.
Konsellu Ministru aseita hodi halo aprovasaun ba proposta refere atu aseita Governu kontrata Empreza Thales hodi halo akizisaun ba mákina imprensaun Pasaporte nian.
Jornalista: Natalino Costa
Editór : Zezito Silva
