BOBONARO, 02 setembru 2024 (TATOLI)-Diresaun Servisu Munisipál Agrikultura (DSMA), Munisípiu Bobonaro, segunda ne’e realiza formasaun konservasaun agrikultura hodi introdús tékniku habokur ho matéria Biochart hare-kulit ba grupu agrikultór sira iha aldeia Sekar, suku Holsa, postu administrativu Maliana no suku Leo-Lima, postu administrativu Balibó, minisípiu Bobonaro.
Diretór DSMA Bobonaro, Longuinhos Joao, española, formasaun ne’e nu’udar programa regulár ho objetivu atu asegura rai-bokur iha agrikultór sira-nia to’os.
Notísia relevante: MAP lansa fini ho variedade foun haat garante hasae produsaun
“Liuliu rai hirak-ne’ebé la tetuk ka rai haliis, tanba ita hatene katak rai haliis ne’e kuandu ita la halo tratamentu ka la halo terasu, wainhira tempu udan, udan been kona rai, sobu rai bokur sira-ne’e hodi muda husi rai sira haliis ba para hotu iha rai-tetuk, entaun rai-bokur laiha ona iha rai-halis,” nia informa ba Jornalista sira iha Sentru Extensaun Agrikultura, Tunubibi.
Longuinhos fundamenta, hafoin partisipa formasaun tékniku extensionista sira sei akompaña agrikultór idak-idak atu implementa tékniku ne’e iha to’os.
Agrikultór aldeia Sekar, Isabel Alves Gonçalves, sente kontente no konsidera formasaun ne’e bele hakbi’it ona sira-nia koñesimentu oinsá atu halo tratamentu ba rai ho matéria prima hare-kulit.
“Durante ne’e ami seidauk hatene atu hadi’a rai, hare-kulit ne’ebé dulas, bainbain ne’e estraga de’it, entaun liuhosi formasaun ne’e ami bele hatene oinsá hadi’a rai liuhosi biocart,” nia konklui.
Enkuantu grupu agrikultór ne’ebé partisipa formasaun durante loron ida kuaze ema na’in-20.
Notísia relevante: Governu apoia fini batar tonelada 20 ba agrikultór Bobonaro
Jornalista: Sérgio da Cruz
Editór: Evaristo Soares Martins
