OÉ-CUSSE, 02 Setembru 2024 (TATOLI) – Xefe aldeia Sifin, suku Usitasa’e, sub-rejiaun Oésilo, Abrão Caunan, preokupa ho reabilitasaun estrada rurál metru 850 iha aldeia Sifin liga ba bairru Masintaom, Lil-As no Nakome perténsia aldeia Pune, tanba la konstrui ponte no bainhira tempu udan bele danifika fali estrada.
“Uluk seidauk hadi’a, komunidade susar lori produtu husi bairru sira-ne’e, tanba mota no estrada ladi’ak. Depois, bainhira hetan moras, liuliu inan-feton sira partu dalaruma hulan de’it, agora ita agradese tanba reabilita ona, maibé triste tanba saida mak ponte laiha fali, ne’e to’o udan bele estraga totál estrada, estraga osan de’it”, Abrão Caunan afirma ba Tatoli iha suku Usitasa’e.
Nia informa katak oras ne’e reabilitasaun ba estrada rurál ne’e finaliza ona, maibé la konstrui ponte iha mota sira liu no nahe de’it simentu iha laran.
Notísia relevante: Xefe suku Usitasa’e propoin ba autoridade RAEOA atu muda sede suku
“Tanba ne’e, ami husu Governu sei bele konstrui mós ponte sira, tanba bairru tolu ne’e iha populasaun kuaze 700-resin mak utiliza estrada ne’e. Ami husu de’it konstrui ponte, nune’e ita tempu udan labele estraga fali [estrada]”, nia propoin.
Xefe suku Usitasa’e, Tomás Ulan Colo, rekomenda ba autoridade RAEOA atu kontrola no halo fiskalizasaun tanba obra bara, ne’ebé konstrui husi Programa Nasionál ba Dezenvolvimentu Suku (PNDS) laiha kualidade.
Nia fó ezemplu ba obra sira-ne’ebé konstrui iha suku Usitasa’e balun aat ona no la’ós iha suku Usitasa’e de’it, maibé kuaze iha suku barak.
“Reabilitasaun ne’e ha’u haree laiha kualidade, tanba serbisu ne’e hanesan emerjénsia hotu. Loloos ne’e la’ós emerjénsia, maibé serbisu la to’o fulan projetu remata ona. Ita haree ba kualidade laiha tanba loloos ne’e atu uza eskavadoda hodi loke luan estrada ne’e, tanba antes ne’e halo ona sosializasaun ba komunidade atu loke estrada. La’ós mai hamoos depois ba fui de’it simentu, depois udan mai sei estraga hotu”, nia kestiona.
Líder komunitáriu ne’e rekomenda ba autoridade RAEOA atu kontrola didi’ak orsamentu ba implementasaun projetu PNDS nian, tanba osan ne’e sai iha suku, autoridade lokál hanesan xefe suku no aldeia sira, inklui Ekipa Jestaun Suku laiha koñesimentu.
Hatán ba problema ne’e, Diretór PNDS, João Bobo, rekoñese katak reabilitasaun estrada rurál iha aldeia Sifin liga ba Pune laiha ponte bazeia ba planta no kadernu enkargu (BoQ, sigla portugés). Maibé nia promete sei konstrui ponte balun iha projetu siklu daneen 2024 to’o 2025 nian.
“Projetu ne’e siklu dalimak nia orsamentu agora tama ona ba pagamentu finál. Ita hahú fali husi siklu daneen (6), maibé siklu lima ne’e finaliza ona no sei laiha ponte, tanba tuir BoQ laiha duni no orsamentu prevee de’it ba estrada la inklui ho ponte sira”, nia informa.
Notísia relevante: PNDS Oé-Cusse implementa ona projetu iha suku 18
Projetu reabilitasaun estrada rurál ne’e ezekuta husi empreza Haumen-Aisaf ho valór kontratu $45.878.21, ne’ebé hahú iha 22 Abríl no finaliza iha 22 Agostu 2024 ho distánsia metru 850.
Jornalista: Abílio Elo Nini
Editora: Maria Auxiliadora
