OÉ-CUSSE, 02 Setembru 2024 (TATOLI) – Xefe Suku Usitasa’e, iha sub-rejiaun Oésilo, Tomás Ulan Colo, propoin ba autoridade Rejiaun Administrativa Espesiál Oé-Cusse Ambeno (RAEOA) atu muda sede suku Usitasa’e iha 2025, tanba edifísiu ne’e besikliu merkadu tradisionál Pune no implika ba atendimentu públiku.
“Ha’u hatama tiha ona iha planu ba 2025. Oras ne’e ita hotu hatene suku 17 iha Oé-Cusse maioria halo ona reabilitasaun, hela suku Usitasa’e mak seidauk halo reabilitasaun, tanba sede suku sei iha problema no tenke muda tanba besikliu merkadu”, Tomás Colo dehan ba Tatoli, ohin.
Notísia relevante: Harii sede suku Usitasa’e, Autoridade RAEOA la prevee iha OJE 2024
Planu atu muda sede suku, daudaun ne’e, Konsellu Suku Usitasa’e submete ona ba autoridade RAEOA, liuhusi Sekretaria Rejionál ba Asuntu Administrasaun hodi propoin iha 2025 atu prevee nia fundu bainhira muda.
“Fatin agora ami identifika ona hamutuk ho konsellu suku, lia-na’in sira iha suku konkorda katak muda, tanba sede ne’e tau loos iha merkadu nia klaran, loloos uza ba merkadu la’ós ba sede suku”, hateten.
Nia lembra katak tuir loloos sede suku muda ona iha 2023, maibé fatin ne’ebé identifika nia estatutu rai sei problema, tanba rai privada, tanba ne’e iha 2024 ne’e identifika fali fatin foun no estatutu rai Estadu.
Rekorde katak iha mandatu autoridade anteriór, iha 2023, konsege reabilita ona sede suku 17 iha Oé-Cusse, maibé suku Usitasa’e mak la prevee nia fundu ba reabilitasaun, tanba sede suku harii besikliu iha merkadu.
Notísia relevante: PNDS RAEOA sei reabilita sede suku hitu iha Pássabe-Nítibe
Populasaun iha suku Usitasa’e hamutuk 3.344, kompostu husi mane 1.793 no feto 1.551 ho totál uma-kain 766 mai husi aldeia Pune, Sifin no Buqui.
Jornalista: Abílio Elo Nini
Editora: Maria Auxiliadora
