JAKARTA, 03 setembru 2024 (TATOLI) – Papa Francisco hafoin viajen liu oras 10 nia laran husi Rome International Airport, to’o ona iha Aeroportu Internasionál Jakarta Soekarno-Hatta iha tuku 11.30 dadeer, oras Jakarta.
Hafoin to’o iha Aeroportu Internasionál Jakarta Soekarno-Hatta, Sua Santidade simu ho seremónia bem-vindu ofisiál iha aeroportu referidu.
Depois serimónia bem-vindu ofisiál, Sua Santidade viajen kedas ba nia rezidénsia iha Nunsiatura Apostólika Indonézia hodi deskansa.
Tuir ajenda, iha Santu Padre ninia vizita loron dahuluk iha Indonézia, nia laiha atividade ofisiál ruma, no atividade hotu sei hala’o iha loron darua (aban, 04/09).
Maibe, iha Aeroportu Internasionál Jakarta Soekarno-Hatta komunidade relijioza Katólika, no jornalista sira entusiazmu tebes hodi hein Santu Padre nia viajen.
Enkuantu iha loron daruak husi vizita Amu Papa nian iha Indonézia, nia sei vizita uluk Prezidente Repúblika Indonezia, Joko Widodo, iha Palásiu Prezidensial Istana Merdeka, hala’o enkontru ho autoridade públiku, sosiedade sívil, no korpu diplomátiku sira iha Salaun Palásiu Presidensiál Istana Negara. Hafoin ne’e, Sua Santidade sei hala’o kedas enkontru privadu ida ho membru The society of Jesus (Jesuits) nian.
Iha loron, Papa Francisco sei hasoru lider relijioza Katólika Indonezia nian, inklui Bispu, Padre, seminarista, katekista no seluktan. Hafoin enkontru ho líder relijioza hirak ne’e, Santu Padre sei hasoru kedas Joven sira husi Scholas Occurrentes iha Sentru Juventude Grha Pemuda.
Iha loron dahaat, Papa Francisco sei lidera Sorumutu Interelijiozu iha Meskita Istiqlal. Hafoin enkontru ne’e, Santu Padre sei hala’o kedas enkontru ida ho benefisiáriu sira husi Organizasaun Karidade iha Sala Konferensia Bispu Indonezia nian. Hafoin ne’e, tuir kedas ho Misa Aberta ne’ebé mak sei prezide hosi Santu Padre iha tuku 5 lorokraik, iha Estádiu Gelora Bung Karno.
Tuir estimasaun Igreza Katólika Indonézia, sarani 90,000-resin mak sei tuir misa referida.
Journalist: Filomeno Martins
Editór: Rafael Ximenes de Assis Belo
