BOBONARO, 03 agostu 2024 (TATOLI)- Sarani sira hosi munisípiu Bobonaro sei konsentra iha área Kaitehu, aldeia Mota-ikun, suku Mota Ulun, postu administrativu Bazartete, munisípiu Liquiçá, hafoin aranka partisipa misa iha Tasi-Tolu, Dili.
Ne’e duni, membru Polísia Nasionál Timor-Leste (PNTL) munisípiu Bobonaro firme no preparadu atu asegura seguransa no orden públika durante viajen peregrinu sira husi postu administrativu idak-idak ba fatin konsentrasaun iha Kaitehu, munisípiu Liquiçá to’o fatin misa iha Tasi-Tolu, Dili.
Deklarasaun ne’e hato’o hosi Komandante PNTL Munisípiu Bobonaro, Superintendente Xefe Agustino Gomes da Silva, durante halo enkontru ho autoridade munisipál Bobonaro, administradór no Igreja hodi diskute preparasaun ikus atu mobiliza sarani sira partisipa misa iha Tasi-tolu ne’ebé sei prezide direita hosi Santidade Papa Fransisco.
Notísia relevante: PNTL Bobonaro rejista krime 121 entre Janeiru no Jullu
“Komandu munisípiu Polisía Bobonaro prepara-an hela atu asegura pregrinu sira husi postu administrativu sira mai kapitál munisípiu depois ba área konsentrasaun Kaitehu, Liquiçá depois ba hatún iha rotunda Tibar, depois ba iha área misa Tasi-Tolu to’o fila fali mai fatin idak-idak,” nia hateten iha salaun Mari-Tapo, tersa ne’e.
PNTL munisípiu Bobonaro sei establese postu postu Polísia rua iha fatin konsentrasaun Kaitheu, Liquiça atu asegura sarani sira no sei akompania mos to’o fatin misa iha Tasi-Tolu.
Planu seguransa PNTL Munisípiu Bobonaro sei fahe ba grupu haat; ida reforsa komandu tátika iha Dili, grupu ida asegura viajen peregrinu, grupu ida halo kontrolu rútina no grupu ida sei konsentra iha munisípiu hodi kontinua garante seguransa no orden públika iha munisípiu Bobonaro.
“Durante vizita santu padre iha ita-nia rai ema idak-idak, tenke kontrola nia-an, labele halo problema, kada família, bairru tenke kontrola nia ema, hodi garante duni pás no estabilidade atu bele simu santu padre,” nia apela.
Biban ne’e, Komandante Agustino Gomes da Silva, husu ba sarani sira atu partisipa misa ne’e tuir regra ne’ebé estabelese ona.
“Sé de’it mak atu partisipa iha misa solene, labele lori arma branka, labele lori gás,tua-sabu, ne’e sei la permite atu lori, ami sei halo pasa revista antes viajen no molok tama iha fatin misa, forsa tarefa konjunta PNTL ho F-FDTL mak sei halo pasa revista,” nia tenik.
Nia dehan, molok viajen komandu eskuadra Polísia iha postu administrativu idak-idak sei halo pasa revista ba kondisaun veíkulu atubele garante viajen sarani sira-nia ho seguru no evita akontese asidente tráfegu.
“Ita-nia viajen ne’e sei lori ema barak, disiplina ne’e importante,” nia fó hanoin.
Kona-bá sarani sira ne’eb’e viajen ho motorizada privada, PNTL Bobonaro só bele autoriza deit to’o iha fatin konsentrasaun Kaitehu, Liquiçá.
Biban ne’e, Diretór Servisu Munisipál Bobonaro, Gíl Bernardo Vicente, esplika parte saúde sei instala postu saúde movél iha área sira hanesan; Mota-Ain, Miguir, Atabae no Loes hodi halo atendimentu ba kazu emerjénsia durante viajen peregrinu.
Nia informa, parte saúde husi NTT, Indonezía nia mo sei apoia karreta ambulánsia rua atu akompaña sarani país rua nia hahú husi pontu entrada Mota-Ain ba to’o Dili.
“Iha-ne’e ami prepara ona ekipa hamutuk 50 depois ekipa P3K mos sei apoia mai ita atu atende kazu emerjénsia sira,” nia konklui.
Tuir dadus provizóriu katak peregrinu munisípiu Bobonaro rejista ona iha Dioseze hamutuk 7,805 mak sei partisipa iha nisa solene ne’e.
Notísia relevante: PNTL Bobonaro la tolera grupu-individu impede serbisu Governu lokál
Jornalista: Sérgio da Cruz
Editór: Evaristo Soares Martins
