PNTL Bobonaro la tolera grupu-individu impede serbisu Governu lokál
BOBONARO, 09 abríl 2024 (TATOLI)-Polísia Nasionál Timor-Leste (PNTL) munisípiu Bobonaro, lideradu Superintendente Xefe Agustinho Gomes da Silva, la tolera grupu no individu ne’ebé tenta impede atividade governu lokál nia ne’ebé la’o iha baze.
Komandante ho diviza ai-funan tolu ne’e hasai ona orden ba komandante eskuadra polísia sira halo aproximasaun no komunikasaun ho administradór postu sira, atu nune’e bele hamutuk hodi garantia seguransa no ordemn públiku iha fatin hotu-hotu.
Notísia relevante: PNTL Bobonaro husu komunidade mantein pás iha 28 Novembru
Komandu Munisípiu Polísia Bobonaro sempre suporta Autoridade Munisípiu Bobonaro hotu-hotu, epesialmente ba prezidente no administradór postu administrativu sira.
“Ida-ne’e hatudu katak PNTL nu’udar forsa seguransa estadu nian, ne’ebé sempre prontu apoia governu lokál, hodi halo dezenvolvimentu iha ita-nia rai sein impedimentu no PNTL mós lakohi atu rona fali individu ida ka grupu ida mai halo tentasaun, impedimentu, ameasa ka insulta, ida-ne’e PNTL lakohi,” nia apela.
Nia akresenta, bainhira PNTL deteta grupu-Individu halo asaun hirak-ne’e sei foti medida liuhosi atuasaun polisiál tuir lei ne’ebé vigora iha Timor-Leste.
“Ita sei husu responsablidade ba individu ka grupu ida-ne’ebé halo ne’e,” nia fó hanoin.
Nia husu ba líder komunitária sira fó informasaun ba autoridade seguransa, bainhira identifika individu-grupu balu ameasa ema nia trankilidade no movimentu.
“Impede ema seluk nia direitu, ne’e viola direitu umanu,” nia akresenta.
Nia dehan, atu minimiza aktu hirak-ne’e presiza reforsa edukasaun informál hodi tranforma ema-nia mentalidade atu moris tuir lei no regra ne’ebé estabelese iha rai-laran.
Notísia relevante: PNTL Bobonaro apresia atetude joven Lourba – Carabau
Jornalista: Sérgio da Cruz
Editór: Evaristo Soares Martins
