iklan

BOBONARO, HEADLINE, MUNISÍPIU, SEGURANSA

PNTL Bobonaro apresia atetude joven Lourba – Carabau

PNTL Bobonaro apresia atetude joven Lourba – Carabau

Komandante PNTL Munisípiu Bobonaro, Superintendente Xefe António de Sá, akompaña hosi nia Adjuntu, Asistente Superintedente Fásio de Jesús Lima, ho Komandante Destakamentu Postu FALINTIL--Forsa Defeza Timor-Leste (F-FDTL), Tunubibi ko’alia hela ho média sira. Imajen Tatoli/Sérgio da Cruz.

BOBONARO, 15 novembru 2023 (TATOLI) – Komandante Polísia Nasionál Timor-Leste (PNTL) Munisípiu Bobonaro, Superintendente Xefe António de Sá, apresia atetude joven sira iha suku Lourba no suku Carabau, postu administrativu Bobonaro tanba hatene estraga uma no sasán, maibé liu tiha sira mos hatene hadi’ak fila-fali.

Komandante Antonio de Sá, hato’o apresiasaun ne’e ligadu ho jestu joven suku rua ne’e hatudu liuhosi atividade limpeza jerál ba uma sira-ne’ebé hetan estragu no sunu durante konfrontu iha loron (02/11) to’o loron (03/11) ne’e.

Notísia relevante: Joven Lourba-Carabau hala’o limpeza jerál

“Ne’e hanesan atetude ne’ebé mak úniku oituan, joven sira-nia úniku, kuandu sira halo ttiha asaltu ba malu, balu kanek, balu sunu uma, maibé konsolida kedas sira-nia unidade, sira rasik kumpre, sira rasik arrepende, sira rasik konsolida kedas unidade liuhosi asaun sira hanesan Limpeza,” nia informa ba jornalista sira iha Maliana, tersa ne’e.

Tuir nia, jestu ne’ebé joven suku rua hatudu dalabarak ema dehan sira sai autór ba konflitu, maibé sira mós sai autór ba pás no estabilidade.

“Entaun ida-ne’e sai hanesan lisaun ida ba joven sira iha fatin seluk, tanba iha fatin seluk akontese problema hanesan, joven sira halai lakon hotu, ita buka la hetan, maibé ida-ne’e úniku, entaun ita bele hatudu nada munisípiu sira, ita-nia jestu ne’ebé la hanesan,” nia katak.

Nia dehan, PNTL no F-FDTL kontinua depozita konfiansa ba joven suku rua ne’e organiza malu hadi’ak uma sira-ne’ebé estragu hosi akontesimentu liubá ne’e.

Superintedente Xefe ne’e konsidera ho akontesimentu ne’e joven sira bele halo reflesaun ida atu hadi’ak-an liután ba futuru.

“Apela nafatin ba joven sira, imi mak hansan futuru nasaun nian, entaun prepara imi-nia esperiénsia, talentu hodi hatudu iha eventu sira mai hansan eventu festivál kultura,” nia apela.

Enkuantu daudaun ne’e autoridade seguransa no defeza kontinua mentein vijilánsia iha suku rua refere hodi garante pás no estabilidade ba komunidade hotu-hotu.

Notísia relevante: PJR atualiza prosesu kazu Lourba ba Xefe Estadu

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!