DILI, 15 novembru 2023 (TATOLI) – Prokuradór Jerál Repúblika, Alfonso Lopes, hasoru malu ho Prezidente Repúblika José Ramos Horta hodi atualiza prosesu kazu konflitu ne’ebé akontese iha Suku Lourba no Suku Carbau, Munisípiu Bobonaro foin lais ne’e.
“Kazu Lourba, ita-nia Prokuradór Primeira Instánsia iha Covalima koopera hamutuk ho Polísia Nasionál Timor-Leste (PNTL) hatama ona partisipasaun ba Prokuradór Primeira Instánsia Covalima no kazu ne’e nia prosesu investigasaun la’o hela no seidauk finaliza, ida-ne’e mak mai hato’o ba Prezidente Repúblika”, Alfonso dehan ba jornalista sira iha Palásiu Prezidensiál, ohin.
Tuir dadus ne’ebé iha, Ministériu Públiku rejista vítima sira ba kazu Lourba hamutuk ema 30, hirak ne’e nia uma no sasan ne’ebé hetan sunu.
“Vítima ba kazu ne’e hamutuk ema 30 mak sira nia uma no sasan hetan sunu hotu, suspeitu ba kazu ne’e ema na’in 15, ne’e provizóriu, iha prosesu investigasaun ita sei rona parte hotu no sei iha posibiliade atu aumenta tan arguidu sira”, nia hatete.
Rekorda fali katak konfrontu entre Suku Lourba no Carbau akontese iha loron kinta (02/11) no sesta (03/11).
Hosi akontesimentu ne’e abitante barak iha Suku Lourba nia sasan hetan estraga hanesan animál, uma no seluk tan no durante konflitu família barak hosi Lourba tenke evakua ba fatin seluk hodi buka zona seguru, maibé daudaun ne’e Lourba hetan ona seguransa hosi PNTL hosi Unidade Batallaun Orden Públiku (BOP) no Falintil Forsa Defeza Timor-Leste (F-FDTL) komponente Terestre Bobonaro, abitante hirak ne’e fila ona ba sira nia hela fatin hodi hein prosesu justisa.
Jornalista: Hortencio Sanchez
Editór : Zezito Silva
