DILI, 04 setembru 2024 (TATOLI) – Governu liuhusi reuniaun Konsellu Ministru, kuarta ne’e, iha Palásiu Governu Dili, aprova projetu Rezolusaun Governu autoriza sosa elevadór ida ba Nunsiatura Apostólika Dili hodi apoia preparasaun simu vizita Sua Santidade Papa Francisco iha Timor-Leste.
“Rezolusaun Governu nian ne’e, autoriza sosa no doasaun elevadór ida ba Nunsiatura Apostólika iha Dili, hodi instala iha ninia edifísiu, ho objetivu atu hadi’a kondisaun mobilidade Sua Santidade Amu-Papa Francisco nian durante ninia estadia iha rai-laran, ne’ebé sei akontese entre loron 9 no 11 fulan-setembru tinan 2024,” tenik iha nota ne’ebé Agência TATOLI asesu.
Notísia relevante: Vizita Papa Francisco lori grasa mai Timor-Leste
Kustu másimu ne’ebé Governu aprova atu sosa elevadór ida-ne’e hamutuk $61,500.
Rekorda fali katak, iha loron 05 fulan-jullu tinan 2024, Vatikanu anunsia ofisialmente, programa Vizita Papa Francisco nian mai Timor-Leste, ne’ebé halo parte husi ninia Viajen Apostólika ba Ázia, ne’ebé marka ona ba períodu husi loron 2 to’o loron 13 fulan-setembru tinan 2024. Aleinde Timor-Leste, viajen ida-ne’e mós inklui etapas iha Indonézia, Papua-Nova Giné no Singapura.
Santu Padre sei to’o iha Timor-Leste iha segunda-feira, loron 9 fulan-setembru tinan 2024, sei hela iha Timor to’o kuarta-feira, loron 11 fulan-setembru tinan 2024.
Programa detalladu ba vizita Papa Francisco mai Timor-Leste hahú ho resesaun ofisiál uainhira Papa to’o iha Aeroporto Internacional Presidente Nicolau Lobato iha tuku 14:10. Iha tuku 18:00, sei hala’o serimónia boazvindas iha área esteriór Palásiu Prezidensiál, tuir kedas ho vizita kortezia ba Prezidente Repúblika iha tuku 18:30. Santu Padre sei hala’o sorumutu ida ho autoridade lokál, sosiedade sivíl no korpu diplomátiku iha sala Palásiu Prezidensiál iha tuku 19:00, iha ne’ebé sei halo diskursu ida.
Iha tersa-feira, loron 10 fulan-setembru, tuku 08:45, Papa sei vizita labarik sira ho defisiénsia husi Eskola “Irmãs Alma”. Tuku 09:30, sei hala’o sorumutu ho bispu no membru sira seluk igreja katólika nasionál nian iha Katedrál Imaculada Conceição. Tuku 10:45, Papa sei hala’o sorumutu ho membrus Kompañia de Jesus iha Nunsiatura Apostólika.
Pontu aas husi vizita ne’e maka iha loron 10 fulan-setembru mós, selebrasaun Santa Misa iha resintu Tasi Tolu, ne’ebé sei hahú iha tuku 16:30 no iha tempu ne’e Papa Francisco sei halo omilia.
Iha kuarta-feira, loron 11 fulan-setembru, Papa Francisco sei hasoru joven sira iha Sentru Konvensoins Dili, iha tuku 09:30, iha ne’ebé sei halo diskursu ida. Iha tuku 10:45, sei hala’o serimónia despedida iha Aeroporto Internacional Presidente Nicolau Lobato, tuir mai Papa sei arranka ba Singapura iha tuku 11:15.
Etapa seluk husi Viajen Apostólika ba Ázia inklui Indonézia, iha ne’ebé Papa Francisco, daudaun iha Jakarta iha loron 3 fulan-setembru no sei fila iha loron 6 fulan-setembru tinan 2024.
Tuir mai, Santu Padre sei ba Port Moresby, Papua-Nova Guiné, iha loron 6 fulan-setembru no sei to’o mai Timor-Leste iha loron 9 fulan-setembru tinan 2024. Ikusliu, hafoin vizita mai Timor-Leste, Papa Francisco sei ba Singapura iha loron 11 fulan-setembru no sei fila ba Roma iha loron 13 fulan-setembru tinan 2024.
Notísia relevante:Papa Francisco no Prezidente Widodo destaka importánsia hametin dame, toleránsia no moris hamutuk
Jornalista: Hortencio Sanchez
Editór: Florencio Miranda Ximenes
