DILI, 05 setembru 2024 (TATOLI) – Família husi Eis Prezidente Repúblika, Francisco Guterres ‘Lú Olo’ no Eis Primeiru Ministru, Taur Matan Ruak, akompaña hosi família reprezenta eis titulár sira responsabiliza ofertóriu ba misa solene iha Tasi-Tolu, Dili, ne’ebé prezide hosi Papa Francisco iha loron 10 setembru, tuku 16:00 lokraik, semana oin.
Asuntu ne’e releta hosi Koordenadór ba Seksaun Liturjia Preparasaun Misa Papa Francisco iha Tasi-Tolu, Padre Justino Tanec, liuhosi programa Entrevista Eskluziva Ajénsia TATOLI, ne’ebé realiza iha Travessa Sérgio Viera de Melo, kinta ne’e.
Amu-lulik ne’e esplika, atu oferese ofertóriu ba selebrasaun misa ne’e responsabiliza hosi grupu haat, kada grupu ne’e iha família, ida reprezenta munisípiu Liquiçá, grupu ida reprezenta munisípiu Baucau no grupu rua mai hosi família eis titulár sira.
Notísia relevante: Sarani 15.000 hosi Ermera sei partisipa misa iha Tasi-Tolu
“Eis titulár ne’e kompostu hosi família señor Francisco Guterres ‘Lú Olo’ ho ninia kaben no oan sira, depois señor Taur Matan Ruak ho ninia oan feto, sira mak sei reprezenta eis titulár sira,” Padre Justino fó-sai.
Amu Lulik ne’e salienta, Dom Virgílio Cardeal da Silva SDB propoin proposta ne’e ba eis titular na’in-rua iha 10 agostu bainhira partisipa semináriu nasionál iha salaun Multi-Uzu GMN TV.
“Sira ho ksolok simu kna’ar ida-ne’e atubele hola parte, liuhosi grupu responsável ba ofertóriu nian,” Padre Justino Tanec akresenta.
Bibi-atan ne’e hatutan, husi totál grupu haat ne’e grupu ida sei lori kalis ne’ebé nia laran iha mós tua no fui ona bee, grupu ida lori sibóriu iha nia laran iha ona óstia, grupu ida lori gailetas, tua no bee no grupu ida tan lori sibóriu ida tán ho óstia iha laran.
“Tuir orientasaun Vatikanu nian katak buat-ne’ebé hasa’e ba ofertóriu sasán sira-ne’ebé presiza duni ba eukarístia nian,” Padre Justino Tanec informa.
Notísia relevante: Sarani sira husi Oé-Cusse sente seguru iha fatin konsentrasaun
Jornalista: Sérgio da Cruz
Editór: Evaristo Soares Martins
