DILI, 06 setembru 2024 (TATOLI)–Koordenadór Jerál Dekorasaun ba vizita Papa husi igreja, Frei Nicolau José, OFM, hateten dekorasaun ka ornamentu ba altar misa solene sua Santidade Papa Francisco iha loron 10 setembru 2024, tuku 16h30, iha Tasi-Tolu ne’e, refleta misaun katólika tinan 509 misionáriu no reprezenta vizita Amu Papa João Paulo II no prezensa Papa Francisco iha Timor-Leste.
Notísia Relevante: Madre Salesiana responsabiliza halo dekorasaun altar ba misa solene iha Tasi-Tolu
Ai-funan sira-ne’ebé atu halo dekorasaun mak ai-funan fresku hanesan ai-funan moris krisan & Aster (mutin & kinur) no pucuk merah, roza kinur no mutin, andona besi, Sirih gadinah, English Ivy, RUscus. Luli kinur no mutinanarek kinur no mutin, Baby breathgladiol kinur no mutin no sedap malam.
“Husi ami-nia konseitu ne’e, husi rampa nian to’o altar reprezenta tinan 509. Vazu pucuk merah ne’e signifika fiar sarani nian iha Timor. Ai-funan iha sirku nian hamutuk 89 ne’e reprezenta tinan 1989 Papa João Paulo II vizita Timor,” Koordenador Jerál dekorasaun ba vizita Papa nian husi igreja, Frei Nicolau José, OFM, hateten ba Agência Tatoli, iha Fomentu, sesta ne’e.
Iha área altar nian ne’e iha kotuk ne’ebé iha aranjus 24 ne’e tinan prezensa amu Papa Francisco nian. iha sirkulu li’ur ne’e tau ai-funan pucuk merah simbolu esperansa no unidade, no restante dekorasaun ba simbólu esperansa nian.
Dekorasaun Katedrál Dili reprezenta ekolojia
Katedral nu’udar fatin enkontru Santu Padre nian ho bispu sira, Padre, relijiozu no relijioza, seminarista no katekista no leigu sira, iha loron 10 setembru iha tuku 10h45.
Dekorasaun ba iha Igreja Katedrál Dili nian reprezenta ekolojia, entaun dekorasaun sira-ne’ebé uza mak ai-horis no ai-funan moris mak hanesan aifunan sira ba dekorasaun anggrek kinur no mutin, rozas mean, pucuk merah, duut mini gajah, sirih belanda, nuu, uma adat lafatik no au.
“Sei la tesi ai-funan no ai-horis hodi halo dekorasaun ida-ne’e atu refleta kona-ba ‘Laudato Si’. Iha mós estututa ema-ne’ebé reprezenta sinodalidade, sentru atensaun mak bee ne’ebé fó moris ba ema sira, la’o hamutuk no diálogu hó Maromak, hanesan bom Samarinu, iha uma adat no duut matak,” nia esplika.
Tema dekorasaun hakarak esplika aspetu rua mak hanesan: Ekolojia no Sinodalidade hanesan simbólu ida ne’ebe igreja Timor-Leste halao no hamoris ona durante ne’e.
- Ekologia: dekorasaun tomak sei uza de’it ai-horis no ai-funan moris. (ai funan la tesi). (Laudato Si)
- Sinodal: sei hatudu iha manekim (estátua ema) oioin: Padre, Madre, ferik katuas, jovem no kiik-oan sira, viajen hamutuk konsentra iha bee-matan, sentru moris ba ema hotu.
- Sentru dekorasaun: Bee ne’ebé sulin, fó moris ba ema sira-ne’ebé la’o hamutuk hodi hasoru malu iha bee-matan no bee ne’e sei fó moris ba sira. Ema-ne’ebe hetan ona moris, lori fali ba ema seluk (Feto Samaritana). Bee signifika: Bee-fatin enkontru ema ho Maromak ne’ebé lori transformasaun, tanba bee sai simbólu ne’ebé fó moris ba ema no natureza
Dekorasaun CCD reprezenta esperansa juventude no povu
Nune’e mós, Sentru Konvensaun Dili (CCD) mós sai fatin sorumutu ida entre sua Santidade Papa Francisco ho foinsa’e timoroan hotu iha loron 11 setembru 2024, iha tuku 09h45.
Simbólu no ai-horis sira-ne’ebé sei tau hodi halo dekorasaun ba iha fatin enkontru Papa ho foinsa’e timoroan iha CCD mak hanesan tuir mai ne’e, tais husi munisipiu hotu-hotu, ai-funan no bandeira nasionál.
Dekorasaun iha CCD ne’e, sei uza tais hamutuk 14 ne’ebé representa joven Timor laran tomak no povu Timor, no ai-tahan sira-ne’e hatudu Laudato Si no esperansa.
Hafoin vizita Santo Padre nian ne’e, joven sira transforma sai joven ne’ebé nakonu ho futuru di’ak ba kreda no nasaun.
Definisaun Bandeira embaixada sira Amo Papa mai nu’udar diplomata ba ema hotu, no nia embaixada sira tomak iha nasaun nian, tanba tais reprezenta kultura no patrimóniu Timor Timor-Leste ba bainaka espesiál.
Iha odamatan oin ka entrada ne’e sei tau ai-funan fresku, meza sorin-sorin ne’e sei tau bandeira Vatikanu no bandeira Repúblika Demokrárika Timor-Leste (RDTL).
Dekorasan ba ambaun no jardin ne’e, sei uza ai-funan fresku, ai-tahan, lafatik, babadok, sanan-rai no tais.
“Iha CCD ne’e, nia dekorasaun ne’e reprezenta ema joven sira nakonu esperansa mak tau tais sira, ai-funan reprezenta ksolok, bandeira kada embaixada sira iha Timor-Leste. Ai-tahan mós reprezenta Laudato Si nu’udar esperansa mak depoizde vizita Papa Franscisco, joven sira sai joven ne’ebé nakonu ho futuru di’ak ba kreda no nasaun,” nia esplika.
Notísia Relevante: KNJK-TL verifika lista juventude 3.000 enkontru ho Papa Francisco iha CCD
Jornalista : Jesuína Xavier
Editór : Cancio Ximenes
