DILI, 06 setembru 2024 (TATOLI) – Sekretáriu Estadu Komunikasaun (SEKOMS), Expendito Dias Ximenes, husu ba Polísia Nasionál Timor-Leste (PNTL) hodi respeita servisu jornalista bainhira hala’o atividade jornalístika.
“Ita maun alin, sira hosi seguransa liuliu polísia oinsá bele mós komprende ou respeita funsaun kolega jornalista nian”, Expendito Dias, hateten jornalista sira hafoin enkontru ho Komandante Jerál Polísia Nasionál Timor-Leste (PNTL), Komisáriu Jerál Polísia, Henrique da Costa iha nia kna’ar fatin Caicoli, sesta, ohin.
Governante ne’e dehan, relasiona ho kazu ne’ebé akontese iha 3 setembru, iha ne’ebé membru PNTL halo impedimentu hasoru jornalista na’in rua, mak hanesan Sekretáriu Estadu Komunikasaun Sosiál mai hasoru malu ho Komandante Jerál PNTL hodi troka imprensaun ba situasaun ida-ne’e, hodi garante seguransa no establidade iha nasaun ne’e.
“Ohin ha’u mai koalia ho señór komandante no señor komandante hanoin katak presiza sosializasaun lei komunikasaun sosiál, kódigu étika jornalizmu nian. Ami mós ohin konkorda ona katak ita sei halo semináriu konjunta ida entre PNTL, SEKOMS no Konsellu Imprensa atu nune’e bele esplika kona-ba oinsá lei komunikasaun sosiál, kódigu étiku jornalizmu no ita mós bele hatene oinsá kna’ar polísia nia hodi kria seguransa ho estabidade ba ita-nia nasaun”, nia adianta.
Expedito haktuir, Komandante Jerál PNTL konkorda tempu balun ita sei halo semináriu ho PNTL atu idaidak bele hatene nia funsaun.
“Ami sei haree tempu depoisde vizita Amu Papa, semináriu ida-ne’e importante tebes ba jornalista no membru PNTL sira,” nia afirma.
Nia husu ba Komandante Jerál PNTL atu ba oin labele akontese tan kazu hanesan foin daudaun akontese ba kolega jornalista na’in-rua.
“Ha’u mós husu ba Komandante PNTL katak jornalista sira bainhira halo atividade kobertura tenke aprezenta ID Card no karteira profisionál husi Konsellu Imprensa no halo servisu tuir duni sira-nia kódigu étika jornalistiku”, nia afirma.
Nia afirma, PNTL sira hotu tenke kompriende no respeita papél jornalista sira-nia bainhira sira halo kobertura.
“Ha’u mós husu ba kolega jornalista sira bainhira kobertura, keta haluha uza ID Card husi mídia ne’ebé imi servisu ba, karik kolega balun iha ona karteira profisionál no imi halo servisu hodi hatudu katak imi profisionál duni”, nia hatutan.
Nia haktuir, polísia iha kompeténsia atu halo identifikasaun ba sidadaun sé de’it, tuir Kódigu Prosesu Penál.
“Sé bainhira ita la hatudu ita-nia idetidade ne’e, signifika katak presiza halo identifikasaun, ohin ha’u husu ba komandante katak kuandu jornalista hatudu ona nia ID Card, entaun la presiza lori fali ba nia eskuadra”, nia konklui.
Iha fatin hanesan, Komandante Jerál PNTL, Komisáriu Jerál Polísia, Henrique da Costa, relasiona ho kazu ne’ebé foin daudaun akontese ba jornalista feto sira, los duni, kolega jornalista halo servisu no polísia mós halo servisu.
Nia konta, momentu ne’e situasaun ladún konduzivu tanba mosu ona dezentendimentu lubuk ida, entaun ekipa SEATOU no alin jornalista n’ee hambrik iha nakukun hasai foto, nune’e ekipa patrollu bolu alin jornalista ne’e maibé mosu diskusaun tanba haree situasaun la konduzivu, entaun Komandante Eskudra foti insiativa hodi lori alin jornalista ba eskudra.
“Depoisde ba eskudra hodi justifika katak alin ne’e jornalista duni depoisde ida-ne’e buat hotu los ona”, nia haktuir.
Nia dehan, Seketáriu Estadu hateten presiza halo edukasaun sívika ba jornalista sira no membru PNTL atu idaidak bele hatene nia servisu, jornalista nia kna’ar mak saida no jornalista mós hatene liután servisu polísia nian.
“Tanba dala barak ema hanoin katak mídia ne’e nia serve tama buat hothotu, lae, nia limitasaun ne’e sempre iha tanba ne’e mak ohin ha’u koalia tiha ona Sekretáriu Estadu depois ida ne’e ita sei realiza semináriu atu nune’e bele esplika kona ba ida-ne’e,”nia konkui.
Notísia relevante : SEATOU ho Autoridade Polisiál halo atentadu sériu kontra Liberdade Imprensa
AJTL husu labele ameasa jornalista iha kobertura maibé respeita
Jornalista:Natalino Costa
Editór : Zezito Silva
