DILI, 08 Setembru 2024(TATOLI) – Peregrinu husi munisípiu Aileu hamutuk 7.500 no daudaun ne’e, grupu dahuluk konsentra ona iha aldeia Konsin, suku Boklelo, postu administrativu Laulara, hodi prepara-aan atu partisipa misa iha Tasi-Tolu no seluk sei to’o iha aban.
Ministru Juventude, Desportu, Arte no Kultura, Nelyo Isaac Sarmento, hateten preparasaun atu simu Papa Francisco prontu ona, liuliu fatin ba sarani sira husi kada munisípiu hodi hela, antes partisipa iha misa solene ne’ebé sei realiza iha loron 10 Setembru.
Governante ne’e dehan Ministériu Juventude, Desportu, Arte no Kultura no Ministériu Justisa maka responsabiliza ba peregrinu sira husi Aileu no ba preparativu sira hanesan fatin hodi toba, sintina, hariis-fatin, inklui hahán sira atu sarani labele hetan problema durante loron tolu iha vizita Papa Francisco iha país ne’e prontu ona.
“Tanba ministériu halo ona liña koordenasaun ho komisaun organizadora lokál iha munisípiu Aileu oinsá bele organiza parókia sira atu lori peregrinu sira mai iha Dili hodi tuir misa iha Tasi-Tolu. Ohin, 08 Setembru iha ona peregrinu balun husi Aileu mak hahú tama ona no aban sei tama barak liu, tanba totál peregerinu husi Aileu hamutuk 7.500″, Nelyo Isaac dehan ba Tatoli iha Casnafar, ohin.
Governante ne’e haktuir katak preparasaun ne’ebé ministériu halo ne’e laiha problema, liña koordensaun ho padre sira la’o di’ak depois Aileu iha postu haat no kada parókia amu sira mak organaniza sarani sira. “Sira mak mai monta rasik sira-nia tenda iha fatin ne’e atu sarani sira bele mai hela hodi bá tuir misa iha Tasi-Tolu”, salienta.
Durante iha prosesu preparasaun la mosu dezentendimentu ruma, tanba sarani sira ne’e iha prinsípiu ida katak atu simu Papa hodi rona mensajen saida mak sei husik hela ba povu Timór.
“Agora, atu organiza peregrinu sira bá iha Tasi-Tolu ne’e maka ministériu kontinua halo komunikasaun ho komisaun nasionál no lokál husi Aileu, bainhira sai husi fatin ne’e bá Tasi-Tolu bele la’o tuir orden. Tanba iha área Casnafar iha peregerinu sira husi munisípiu Manufahi, ne’ebé parte ministériu sei koordena ho di’ak atu konvoi bá Tasi-Tolu labele hamosu engarrafamentu”, afirma.
Kona-ba transporte sira ne’ebé tula peregrinu sira, Aileu rejista ona karreta hamutuk 100 maka preparadu atu lori sarani sira hodi bá tuir misa.
Ba programa simu Papa Francisco iha aeroportu, ministru esplika katak husi Aileu sei reperzenta ema balun mak bá simu, depois sei iha peregrinu balun maka nia naran tama ona iha lista atu halo enkontru ho Papa iha Sentru Konvensaun Dili.
“Sira ne’ebé naran la tama sei partisipa de’it misa iha Tasi-Tolu depois fila mai konsentra iha fatin ne’e hodi prepara filafali bá Aileu”, realsa.
Notísia relevante: Governu prepara ona kondisaun ba sarani Bobonaro iha Kaitehu
Jornalista: Tomé Amado
Editora: Maria Auxiliadora
