DILI, 08 setembru 2024 (TATOLI) –Papa Francisco hakerek ona ensíklika signifikativu tolu durante nia papadu hafoin sai Papa iha tinan-2013. Ensíklika sira ne’e ida-idak aborda tema krítiku sira ne’ebé relevante ba sosiedade kontemporánea (ohin loron):
Lumen Fidei (Naroman Fiar nian)
Publika iha 29 juñu 2013, Lumen Fidei maka Papa Francisco nia ensíklika dahuluk, ne’ebé elabora iha esbosu ida husi nia antesesór, Papa Bento XVI. Ensíklika ida-ne’e esplora natureza fiar nian, ninia relasaun ho razaun, no ninia knaar iha Kreda nia moris. Lumen Fidei ida-ne’e subliña katak fiar maka naroman ida ne’ebé orienta sarani sira liuhusi nakukun no dezafiu sira, hodi husu sira atu envolve ho mundu enkuantu metin nafatin iha sira-nia fiar espirituál (https://www.cbcew.org.uk/home/the-church/the-pope/pope-francis/encyclical-lumen-fidei-light-of-faith/)
Laudato Si (Kuidadu Ita-nia Uma Komún)
Fó sai iha loron 24 fulan-maiu tinan-2015, Laudato Si’ aborda kestaun ambientál sira no interligasaun husi krize sosiál no ekolojia sira. Ensíklika husu “konversaun ekolójiku” ida no destaka imperativu morál hodi tau-matan ba planeta no nia abitante sira. Laudato Si kritika “paradigma teknokrátiku” ne’ebé fó prioridade ba lukru duké ema no natureza, hodi husu mudansa ba prátika sustentável sira no distribuisaun rekursu sira ne’ebé justu liu (https://www.vatican.va/content/dam/francesco/pdf/encyclicals/documents/papa-francesco_20150524_enciclica-laudato-si_en.pdf).
Fratelli Tutti (Kona-ba Fraternidade no Amizade Sosiál)
Publika iha loron 3 fulan-outubru tinan-2020, Fratelli Tutti subliña importánsia husi fraternidade umana no amizade sosiál hodi harii mundu ida ne’ebé justu no pasífiku liu. Hodi hetan inspirasaun husi São Francisco de Assis, ensíklika ne’e defende domin no solidariedade ne’ebé hakat liu fronteira no diferensa sira. Fratelli Tutti aborda kestaun sira hanesan pobreza, pena de morte, no nesesidade ba aprosimasaun ida-ne’ebé inkluzivu liu ba relasaun internasionál sira, hodi reforsa katak ema hotu-hotu hanesan iha dignidade no direitu sira. Ensiklika sira-ne’e reflete Papa Francisco nia kompromisu atu aborda kestaun globál sira ne’ebé urjente liuhusi lente fiar, ekolojia, no justisa sosiál.
Dokumentu kona-ba Fraternidade Umana
- Dokumentu kona-ba Fraternidade Umanu asina iha 2019 hosi Papa Francisco no Grande Imam husi Al-Azhar Ahmed al-Tayyeb iha Abu Dhabi (https://www.vatican.va/content/francesco/pt/travels/2019/outside/documents/papa-francesco_20190204_documento-fratellanza-umana.pdf)
- Dokumentu ne’e proklama kona-ba importánsia “fraternidade” nian hodi promove pás mundiál no konvivénsia komún (https://www.vatican.va/content/francesco/pt/encyclicals/documents/papa-francesco_20201003_enciclica-fratelli-tutti.html)
- Iha tinan-2022, Timor-Leste sai hanesan nasaun dahuluk ne’ebé ofisialmente hatama Dokumentu kona-ba Fraternidade Umana iha nia sistema legál no edukasaun públika.
- Parlamentu Nasionál Timor-Leste aprova ho unanimidade rezolusaun ida kona-ba dokumentu iha fulan-maiu 2022, hodi repete kompromisu nasaun nian ba valór sira dame nian, diálogu no respeitu ba direitus umanus.
Inisiativa sira iha Timor-Leste
- Iha setembru 2022, “Sentru Timor Leste ba Fraternidade Umana ba Dame Mundiál” loke iha Dili.
- Dokumentu ne’e sei hatama ba kurríkulu eskola públika nian iha nível hotu-hotu iha Timor-Leste no nia konteúdu sei aprofunda iha sentru nia laran.
- Prezidente José Ramos-Horta destaka ona importánsia husi Deklarasaun Fraternidade Umana ba nasaun (https://www.vaticannews.va/pt/mundo/news/2022-05/republica-de-timor-leste-adotara-o-documento-fraternidade.html).
Oinsá Igreja Katólika iha Timor-Leste kolabora hela ho governu iha implementasaun Dokumentu
Igreja Katólika iha Timor-Leste kolabora ativu ho governu iha implementasaun Dokumentu kona-ba Fraternidade Umana, hanesan evidénsia husi deklarasaun sira husi Prezidente José Ramos-Horta. Nia realsa katak, tuir adopsaun dokumentu ne’e husi Parlamentu Nasionál, governu kompromete atu servisu hamutuk ho Igreja no grupu relijiozu sira seluk atu integra dokumentu ne’e nia hanorin no valór sira iha kurríkulu eskolár nasionál.
Kolaborasaun entre Igreja no Governu
- Integrasaun iha Kurríkulu Eskolár: Igreja Katólika hala’o papél fundamentál iha edukasaun iha Timor-Leste, no kolaborasaun ho governu iha objetivu atu garante katak prinsípiu sira hosi Dokumentu kona-ba Fraternidade Umana hanorin iha instituisaun edukasionál sira nasaun nian. Prezidente temi espesifikamente intensaun atu inkorpora valór hirak ne’e iha sistema edukativu, reflete importánsia Igreja nian iha formasaun morál no étika sosiedade timoroan nian.
- Apoiu Espirituál no Materiál: Istorikamente, Igreja Katólika sai nu’udar referénsia importante ba populasaun timoroan, hodi oferese apoiu espirituál no materiál. Relasaun ne’e hametin ho adosaun dokumentu nian, ne’ebé promove dame no diálogu interrelijiozu, aliña ho valór sira ne’ebé Igreja defende daudaun ona.
- Promosaun Fraternidade: Governu no Igreja komprometidu atu promove fraternidade no koezisténsia pasífika entre grupu relijiozu no kulturál oioin iha Timor-Leste. Adosaun dokumentu ne’e haree hanesan pasu signifikativu ida hodi haburas ambiente respeitu no komprensaun mútua, ne’ebé esensiál ba estabilidade sosiál no dezenvolvimentu nasaun nian.
- Interasaun entre Igreja Katólika no governu Timor-Leste iha implementasaun Dokumentu kona-ba Fraternidade Umanu ezemplu esforsu konjuntu ida hodi promove valór sira dame nian, toleránsia no respeitu nian, ne’ebé fundamentál atu harii sosiedade ida ne’ebé koezivu no armonia liu. (https://ramoshorta.com/papa-destaca-timor-leste-pela-adopcao-do-documento-da-fraternidade-humana/)
Notísia relevante:KM aprova dekretu-lei kurríkulu ensinu báziku nasionál
TATOLI
